बीडच्या मस्साजोगचे माजी सरपंच संतोष देशमुख हत्या प्रकरणातील मुख्य आरोपीसह अन्य आरोपींना तातडीने अटक करून सर्व आरोपींना फाशीची शिक्षा देण्यात यावी या प्रमुख मागणीसाठी आज बीड शहरातील डॉ. बाबासाहेब आंबेडकर पुतळा ते जिल्हाधिकारी कार्यालय असा सर्वपक्षीय मूक मोर्चा काढण्यात आला आहे. या मुक मोर्चाला नागरिकांची गर्दी झाली आहे. 20 दिवस झाले तरी आम्हाला न्याय मिळाला नसल्याची भावना यावेळी आंदोलकांनी व्यक्त केली आहे.

या मोर्चाला मस्साजोगचे सरपंच संतोष देशमुख यांची मुले व पत्नीसह बंधू धनंजय देशमुख हे देखील सहभागी झाले आहेत. हा मोर्चा कोणाच्याच नेतृत्त्वात काढण्यात येत नसल्याचे यावेळी सांगण्यात आले. मोर्चाला समर्थकांची आणि राजकीय नेत्यांची गर्दी लक्षणीय आहे. मराठा आंदोलक मनोज जरांगे पाटील हे देखील या मोर्चात सहभागी झाले आहे. यावेळी त्यांनी संतोष देशमुख यांच्या कुटुंबीयांची भेट घेतली. हा जनतेचा मोर्चा आहे. त्यामुळे मी देखील या मोर्चात सहभागी होण्यासाठी आलो असल्याचे यावेळी त्यांनी पत्रकारांशी बोलताना सांगितले. देशमुख यांना न्याय मिळेपर्यंत आम्ही मागे हटणार नसल्याचेही जरांगे म्हणाले.