बदलापूर येथील चिमुकल्यांच्या अत्याचारातील आरोपी अक्षय शिंदे याच्या एन्काऊंटरप्रकरणी सुनावणी सुरूच राहणार आहे, असा निर्णय मुंबई हायकोर्टाने दिला आहे. अक्षय शिंदेच्या पालकांनी याचिका मागे घेण्याची मागणी केली होती. तसंच या वयात आम्हाला धावपळ शक्य नाही, असंही अक्षय शिंदेच्या पालकांनी म्हटलं होतं.

बदलापूर येथे शाळेत दोन चिमुकल्या मुलींवर अत्याचार केल्याची घटना काही महिन्यांपूर्वी घडली होती. यातील आरोपी अक्षय शिंदे याचा पोलिसांनी एन्काऊंटर केला आहे. त्यानंतर या प्रकरणी एन्काऊंटरवर शंका उपस्थित करत अक्षयच्या पालकांनी कोर्टात धाव घेतली होती. त्यानंतर या वयात आम्हाला धावपळ शक्य नाही, असं कारण देत अक्षयच्या पालकांनी ही याचिका मागे घेण्याची मागणी कोर्टाकडे केली होती. ती मागणी आज मुंबई हायकोर्टाने फेटाळली आहे. तुम्ही सुनावणीला गैरहजर राहिलात तरी सुनावणी सुरूच राहील असं कोर्टाने म्हंटलं आहे. याप्रकरणावर पुढील सुनावणी ही २४ फेब्रुवारीला होणार आहे.