अकोल्यातील मंगेश नावाच्या ३४ वर्षीय तरुणाने लग्न होत नसल्याने थेट राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांना पत्र लिहून पत्नी मिळवून देण्याची मागणी केली आहे. शरद पवार अकोल्यात शेतकरी संवाद कार्यक्रमासाठी आले असता, मंगेशने त्यांना हे निवेदन दिले, ज्यामुळे ग्रामीण भागातील तरुणांच्या लग्नाचा गंभीर प्रश्न पुन्हा एकदा चर्चेत आला आहे. यावर बोलताना मंगेश म्हणाला, पवार साहेबांपर्यंत जो कुठला विषय गेला तर त्याच्यावर कुठला ना कुठला तोडगा निघतो. म्हणून मी पवार साहेबांजवळच गेलो. आपल्या पत्रात त्याने कोणत्याही समाजाची मुलगी चालेल आणि मुलीच्या घरीही राहण्यास तयार असल्याचे म्हटले आहे. बी.ए. समाजशास्त्र शिक्षण झालेल्या मंगेशच्या या पत्रामुळे एक सामाजिक समस्या समोर आली आहे.