अक्षय गवळी, अकोला | साम टीव्ही

अकोला महापालिकेत कोणत्याही पक्षाला बहुमत मिळालं नाही. त्यामुळं सत्तास्थापनेचा पेच निर्माण झाला आहे. सर्वाधिक जागा जिंकणाऱ्या भाजपला सत्तेपासून दूर ठेवण्यासाठी चार पक्ष एकत्र आले आहेत. काँग्रेस, राष्ट्रवादी, वंचित बहुजन आघाडी आणि ठाकरे गट एकवटले आहेत. दुसरीकडं महापौरपदावरून 'वंचित' आणि 'ठाकरे' गटात रस्सीखेच सुरू झाली आहे. दरम्यान, भाजपनेही ठाकरे गटाशी संपर्क साधल्याने अकोल्यातील राजकारण आता 'हायव्होल्टेज' झालं आहे.

अकोला महापालिकेत कसं आहे सत्तेचं गणित?

अकोला महापालिकेची निवडणूक झाली. ८० जागांसाठी ही निवडणूक घेण्यात आली. बहुमतासाठी कोणत्याही एका पक्षाला ४१ चा जादुई आकडा पार करावा लागणार होता. मात्र, निवडणुकीत कुणालाही मॅजिक फिगर गाठता आली नाही. भाजपला सर्वाधिक ३८ जागांवर विजय मिळाला. तर दुसऱ्या क्रमांकावर काँग्रेस राहिला. काँग्रेसच्या २१ जागा निवडून आल्या. ठाकरे गटाचे सहा उमेदवार निवडून आले. तर शिंदेसेनेचा एक उमेदवार विजयी झाला. अजित पवारांच्या राष्ट्रवादीलाही फार काही यश मिळालं नाही. अवघी एक जागा जिंकून आली. तर शरद पवार गटाने तीन जागा जिंकल्या. वंचित बहुजन आघाडीला पाच जागांवर विजय मिळाला. एमआयएम पक्षाने ३ जागांवर विजय मिळाला. तर २ अपक्ष उमेदवारही निवडून आले आहेत.