विकासकामं आणि रस्त्याची कामं दर्जेदारच झाली पाहिजे. आम्ही निधी दिला आहे. कामं नीट केली नाही तर मी संबंधित ठेकेदारांना ब्लॅक लिस्ट करेल, अशी तंबी उपमुख्यमंत्री अजित पवार यांनी एका कार्यक्रमात बोलताना ठेकेदारांना दिली आहे. ब्रिटिश काळातील कामं शंभर शंभर वर्ष टिकली. आपली कामं २५ वर्ष सुद्धा टिकत नाहीत. कॉन्ट्रॅक्टर कामं कशाला घेतात? त्यांना कोणी काम घ्या असं मागे लागलेलं नसतं, असे खडेबोल देखील अजित पवार यांनी यावेळी ठेकेदारांना सुनावले आहेत.

पुढे बोलताना अजित पवार म्हणाले की, चांगल कामं केलं नाही तर मी काहीही न बघता अशा ठेकेदारांना काळ्या यादीत टाकेल. तुम्ही तुमचा नफा नक्की कमवा. पण आमचं काम नीट करून द्या. कोणत्याही पुढाऱ्याने कामात लुडबूड करू नये. वाळू माझ्याकडून घ्या, सीमेंट माझ्याकडून घ्या, मला काम द्या, हे असं चालणार नाही. तुमच्यात रग असेल तर तुम्ही टेंडर भरा, काम घ्या आणि चांगलच काम करा, अशी तंबीच अजित पवार यांनी आता ठेकेदारांना दिली आहे.