इंदापूरमधील श्री छत्रपती साखर कारखान्यावर पुन्हा एकदा अजित पवारांचे वर्चस असणार आहे. या कारखान्याच्या निवडणुकीमध्ये अजित पवारांचे 21 पैकी 21 उमेदवार मोठ्या मताधिक्याने विजयी झाले. श्री छत्रपती कारखान्यावर श्री जय भवानी माता पॅनलला एक हाती सत्ता मिळवण्यात पुन्हा यश आले आहे. या निवडणुकीत संघर्षमय झालेल्या लढतीमध्ये श्री जय भवानी माता पॅनलने श्री छत्रपती बचाव पॅनलचा सुपडा साफ केला.

इंदापूर तालुक्यातील श्री छत्रपती सहकारी साखर कारखान्याच्या पंचवार्षिक निवडणुकीकडे संपूर्ण पुणे जिल्ह्यासह पश्चिम महाराष्ट्राचे लक्ष लागलं होतं. अखेर या निवडणुकीचा निकाल लागला. पुन्हा एकदा या निवडणुकीत राज्याचे उपमुख्यमंत्री अजित पवार यांनी एक हाती सत्ता राखत निर्विवाद वर्चस्व मिळवलं. अजित पवार राज्याचे क्रीडामंत्री दत्तात्रय भरणे आणि राज्य साखर संघाचे माजी अध्यक्ष पृथ्वीराज जाचक यांच्या नेतृत्वातील श्री जय भवानी माता पॅनेलचे 21 पैकी 21 उमेदवार मोठ्या मताधिक्याने विजयी झाले.

उपमुख्यमंत्री अजित पवार यांचा राजकीय प्रवास इंदापूर तालुक्यातील श्री छत्रपती सहकारी साखर कारखान्याच्या निवडणुकीतून सुरू झाला. उपमुख्यमंत्री अजित पवार यांच्या नेतृत्वाखालील जय भवानी पॅनल सर्वच्या सर्व 21 जागा जिंकून वर्चस्व निर्माण केले आहे तर विरोधकांना एकही जागा मिळाली नाही.