मराठी आणि इंग्रजी शाळांमध्ये पहिली ते चौथीपर्यंत हिंदी भाषा शिकवण्याच्या राज्य सरकारच्या निर्णयावरून विरोधकांनी रान उठवलं असतानाच, सत्ताधारी पक्षाचे प्रमुख नेते, उपमुख्यमंत्री अजित पवार यांनी पहिलीपासून हिंदी भाषा तिसरी भाषा म्हणून शिकवण्याच्या निर्णयाला कडाडून विरोध केला आहे. हिंदी भाषा पाचवीपासून शिकवण्यात यावी, अशी ठाम भूमिका त्यांनी मांडली.

उपमुख्यमंत्री अजित पवारांनी पहिलीपासून हिंदी भाषा सक्तीला विरोध केलाय. हिंदी भाषा पाचवीपासून शिकवण्यात यावी, असे ते म्हणाले. तर पहिली ते चौथीपर्यंत मराठी भाषा शिकवावी, असंही ते म्हणाले.

मला असं वाटतं की पहिली ते चौथीपर्यंत हिंदी असू नये. पाचवीपासून हिंदी शिकवावी. पहिलीपासून मराठी भाषाच शिकवावी. मराठी लिहिता-वाचता यावी. पहिलीपासून सेमी इंग्रजी सुद्धा सुरू केली आहे. भाषा कुठली शिकू नये या मताचे कुणीच नाही. वेगवेगळ्या क्षेत्रातील मान्यवरांचंही मत हेच आहे, असंही त्यांनी सांगितलं.