वक्फ दुरुस्ती विधेयकाला अजित पवार यांच्या राष्ट्रवादी काँग्रेसनं समर्थन दिलं आहे. अजित पवारांच्या खासदारांनी लोकसभेत वक्फ दुरुस्ती विधेयकाच्या बाजूने मतदान केलं आहे. पक्षाची भूमिका न मांडताच खासदार सुनील तटकरे यांनी लोकसभा सभागृहात वक्फ दुरुस्ती विधेयकाच्या बाजूने मतदान केले आहे. हे विधेयक आज, गुरुवारी राज्यसभेत मांडण्यात आले. विशेष म्हणजे अजित पवार यांच्या राष्ट्रवादी काँग्रेसचे राज्यसभेत तीन खासदार आहेत.

वक्फ दुरुस्ती विधेयक काल, बुधवारी लोकसभेत मांडण्यात आलं. तब्बल १२ तासांहून अधिक तास त्यावर चर्चा झाल्यानंतर रात्री उशिरा या विधेयकाला बहुमताने मंजुरी देण्यात आली. यावरील चर्चेदरम्यान सत्ताधारी आणि विरोधक यांच्यात सामना रंगला. आता हे विधेयक चर्चेसाठी राज्यसभेत सादर केले आहे.

राज्यसभेत या विधेयकासंदर्भात चर्चा दुपारी १ वाजता सुरू होणार आहे. दुसरीकडे राज्यसभेत या विधेयकावर चर्चा होण्याआधीच विरोधाची धार तीव्र झाली आहे. सभापती धनखड यांनी सांगितले की, ज्या सदस्यांना दुरुस्ती नोटिस द्यायची असेल त्यांनी एक वाजताच्या आधीच द्यावी. मात्र, त्यावर तृणमूल काँग्रेसचे साकेत गोखले यांनी आक्षेप नोंदवला असून, नियमानुसार, दुरूस्तीसंबंधीच्या नोटिशीसाठी २४ तास मिळतात. लोकसभेत मध्यरात्री विधेयक मंजूर केल्यानंतर काही तासांतच नोटीस मागवल्या जात आहेत, हे योग्य नाही, असे ते म्हणाले.