भरत मोहळकर, साम टीव्ही

राष्ट्रवादी काँग्रेसच्या फुटीनंतर अजित पवारांनी पहिल्यांदाच शरद पवारांची भेट घेतली.. भेटीचं कारण होतं शरद पवारांचा 85 वा वाढदिवस... मात्र या भेटीवेळी अजित पवारांनी शरद पवारांशी बंद दाराआड चर्चा केली. त्यामुळे राजकीय चर्चांना उधाण आलंय.. तर मी बाहेरचा नाही, घरातलाच असल्याचं विधान अजित पवारांनी केलंय.

अजित पवारांच्या भेटीनंतर युगेंद्र पवार आणि रोहित पवारांनी मात्र पवार कुटुंब एकत्र येण्याचे संकेत दिले आहेत. अजित पवारांनी सहकुटुंब पवारांची भेट घेतल्याच्या मुद्द्यावरून संजय राऊतांनी चांगलंच तोंडसुख घेतलंय.

अजित पवार आणि शरद पवारांच्या भेटीमुळे अनेक प्रश्न निर्माण झालेत. ते नेमके काय आहेत? पाहूयात...

भेट की तह?

पवार कुटुंब पुन्हा एकत्र येणार का?

दोन्ही राष्ट्रवादी विलीन होणार का?

शरद पवारांची राष्ट्रवादी एनडीए सोबत जाणार का?

गद्दारांना पाडा म्हणणारे शरद पवार त्यांना स्वीकारणार का?

पवारांनी भाजपला या भेटीतून संदेश दिला का?

राष्ट्रवादीच्या फुटीनंतर वारंवार नजरा-नजर टाळणाऱ्या अजित पवारांनी दिल्लीत पवारांच्या वाढदिवसाच्या निमित्ताने शरद पवारांची भेट घेतली. त्यामुळे ही कौटुंबिक भेट होती की आपल्यासाठी परतीचे दरवाजे खुले असल्याचा भाजपसाठीचा संदेश? हे आगामी काळात स्पष्ट होणार आहे.