आगामी विधानसभा निवडणुका एका टप्प्यात घ्या, अशी मागणी सत्ताधारी पक्षातील अजित पवार गट आणि शिंदे गटाने निवडणूक आयोगाकडे केली आहे. त्याचबरोबर ज्येष्ठ नागरिक वय मर्यादा 85 वरून 80 करण्यात यावे अशीही मागणी त्यांनी केली आहे.

आगामी विधानसभा निवडणुकीच्या अनुषंगाने सध्या तयारी सुरू आहे. त्याचसाठी निवडणूक आयोग महाराष्ट्र दौऱ्यावर आहे. निवडणूक आयोगाचे काही केंद्रीय अधिकारी मुंबईत दाखल झालेले आहेत. त्यानंतर त्यांची सर्व पक्षांच्या काही नेत्यांसोबत बैठक झाली आहे. याच बैठकीत सत्ताधारी पक्षातील अजित पवार राष्ट्रवादी गट आणि एकनाथ शिंदे यांच्या शिवसेनेकडून आगामी विधानसभा निवडणूका या एकाच टप्प्यात घेण्यात याव्यात अशी मुख्य मागणी करण्यात आली आहे. तसेच ज्येष्ठ नागरिकांची वयोमर्यादा ही 85 वरून 80 करण्यात यावी अशी देखील मागणी त्यांनी केली आहे. त्यामुळे आता यावर निवडणूक आयोग काय निर्णय घेईल याकडे सगळ्यांचं लक्ष लागलं आहे.