अहिल्यानगर जिल्ह्यात मंगळवारी सायंकाळच्या सुमारास अवकाळी पावसाने थैमान घातले. वाळकी, खडकी, खंडाळा, गुंडेगाव या परिसरात ढगफुटी सदृश्य पावसामुळे जनजीवन विस्कळीत झाले आहे. खडकी परिसरातील वालुंबा नदीला अचानक मोठा पूर आल्याने पाच जण अडकून पडले होते. ग्रामस्थांच्या सतर्कतेमुळे तातडीने प्रशासनाला माहिती देण्यात आली.

जिल्हा आपत्ती व्यवस्थापन पथक आणि पोलीस तात्काळ घटनास्थळी दाखल झाले आणि योग्य समन्वय साधत बचावकार्य राबवण्यात आले. अखेर या पाचही नागरिकांना सुखरूप बाहेर काढण्यात यश आले.या पावसामुळे शेतीचे मोठ्या प्रमाणात नुकसान झाले असून, काही ठिकाणी वीजपुरवठाही खंडित झाला आहे. तसेच प्रशासनाने तात्काळ मदत करावी अशी विनंती शेतकऱ्यांनी केली.