२००६ मध्ये राज्यभर गाजलेल्या पवनराजे निंबाळकर हत्याकांडाचा निकाल आज मुंबईतील न्यायालयात जाहीर होण्याची शक्यता आहे. तब्बल वीस वर्षांपासून सुरू असलेल्या या खटल्यातील अंतिम निर्णयाकडे धाराशिवसह संपूर्ण महाराष्ट्राचे लक्ष लागले आहे. या प्रकरणात माजी गृहमंत्री डॉ. पद्मसिंह पाटील, माफीचा साक्षीदार पारसमल जैन, गुरूर दिग्विजय तिवारी, पिंटू ऊर्फ छोटे पांडे यांच्यासह एकूण नऊ आरोपींना कोर्टाने निकालाच्या वेळी हजर राहण्याचे आदेश दिले आहेत. ३ जून २००६ रोजी मुंबईतील कळंबोलीजवळ पवनराजे निंबाळकर आणि त्यांचे चालक समद काझी यांची गोळ्या झाडून हत्या करण्यात आली होती. या प्रकरणाचा तपास 'सीबीआय'कडे (CBI) सोपवण्यात आला होता.

सुनावणी दरम्यान तब्बल १२८ साक्षीदार तपासण्यात आले असून, तपासात अनेक राजकीय आणि गुन्हेगारी धागेदोरे समोर आले होते. या खटल्यातील काही आरोपींना यापूर्वी जामीन मिळाला असला, तरी आजच्या निकालामुळे पुन्हा एकदा संपूर्ण राज्याचे लक्ष या प्रकरणाकडे वेधले गेले आहे. न्यायालय आज नेमके कोणाला दोषी ठरवते आणि कोणाची निर्दोष मुक्तता करते, याकडे सर्वांच्या नजरा लागल्या आहेत.