विधानसभा निवडणुकीच्या पार्श्वभूमीवर आणि आपल्या प्रचाराचा हातखंडा बनवण्यासाठी सरकारने लाडकी बहीण योजना लागू केली. यामध्ये थेट महिलांना पंधराशे रुपये आपल्या बँक खात्यात मिळायला लागले. यानंतर महायुतीने आपल्या जाहीरनाम्यात आम्हाला निवडून द्या आम्ही लाडक्या बहिणींना 2100 रुपये देऊ असं वचन दिलं होतं. मात्र सरकार स्थापन झाल्यानंतर पहिल्याच अर्थसंकल्पामध्ये सरकारला दिलेल्या वचनाचा विसर पडला. यानंतर विरोधकांनी सरकारला धारेवर धरले. याबाबत मंत्री आदिती तटकरे यांनी आज लाडकी बहीण योजनेबाबत मोठे विधान केलं. या योजनेमध्ये आम्ही 2100 रुपये देण्याचा वचन दिलं आहे. त्यामुळे आम्ही योग्य वेळी हे वचन पूर्ण करू असे विधान अदिती तटकरे यांनी केले. त्या म्हणाल्या, लाडकी बहिण योजना आम्ही महिलांना आर्थिक दृष्ट्या सक्षम बनवण्यासाठी योजना सुरू केली आहे. आता या पुढचे पाऊल महिलांमध्ये आर्थिक साक्षरता आणणे हे आहे. आणि 2100 चा निर्णय महायुती सरकार योग्यवेळी घेईल. जसे पंधराशे रुपये देण्याचं वचन पूर्ण केलं तसंच 2100 रुपयाचे देखील आम्ही वचन पूर्ण करणार आहोत. आम्ही दिलेल्या वचनापासून फारकत घेतली नाहीये असे आदिती तटकरे म्हणाल्या.