यशस्वी जयस्वालने रणजीसह अन्य देशांतर्गत क्रिकेट स्पर्धा मुंबईच्या ऐवजी गोव्याच्या संघाकडून खेळण्याचा निर्णय घेतला आहे. यासाठी त्याने मुंबई क्रिकेट असोसिएशनकडे एनओसीसह गोव्याकडून खेळण्याची परवानगी मागितली होती. त्याच दरम्यान मुंबईचा कर्णधार अजिंक्य रहाणेशी यशस्वी जयस्वालचा वाद झाल्याच्या चर्चा सोशल मीडियावर व्हायला लागल्या.

मुंबईऐवजी गोव्याकडून खेळण्याच्या यशस्वी जयस्वालच्या निर्णयावर अनेकांनी प्रतिक्रिया दिली आहे. या प्रकरणावर आता माजी क्रिकेटपटू आणि समालोचक आकाश चोप्राने देखील भाष्य केले आहे. आकाश चोप्राने त्याच्या यूट्यूब चॅनलवर पोस्ट केलेल्या व्हिडीओमध्ये 'यशस्वी जयस्वालचे मुंबई सोडून गोव्याकडून खेळण्यासाठी जाणे ही मोठी बाब आहे', असे म्हणाला.

'यशस्वीने पैशांसाठी गोव्याच्या संघाकडून खेळण्याचा निर्णय घेतलेला नाही. टीम इंडियाकडून खेळणाऱ्या क्रिकेटपटूंना पगार मिळतो. मी स्वत: ३ वर्षे प्रोफेशनल क्रिकेट खेळलो आहे. पूर्वी पैशांसाठी असे निर्णय घेतले जात. पण यशस्वी जयस्वालचे आयपीएलमधील मानधान १८ कोटी रुपये आहे. भारतीय संघाच्या वार्षिक कराराच्या यादीत त्याचे नाव आहे. तो पैशांसाठी असं करणार नाही', असे आकाश चोप्रा म्हणाला.

सध्या यशस्वी जयस्वाल आयपीएल २०२५ मध्ये व्यस्त आहे. तो राजस्थान रॉयल्सकडून खेळत आहे. आयपीएल २०२५ च्या सुरुवातीच्या सामन्यांमध्ये यशस्वी जयस्वाल धावा करण्यात अयशस्वी ठरला होता. आज पंजाब विरुद्ध राजस्थान या सामन्यामध्ये यशस्वी जयस्वाल चांगला खेळ करेल अशी चाहत्यांनी आशा व्यक्त केली आहे.