भारताचा स्टार रेस्टलर बजरंज पुनियावर मोठी कारवाई करण्यात आली आहे. यामध्ये NADA (National Anti Doping Agency) ने भारतीय स्टार कुस्तीपटू बजरंग पुनियावर कडक कारवाई केलीये. NADA ने त्याच्यावर ४ वर्षांची बंदी घातली आहे. बंदी घालण्याचे कारण म्हणजे अँटी डोपिंग कोडचं उल्लंघन केलं असल्याचं माहिती आहे.

या कारवाईमुळे बजरंग पुनियाचं करियर संपुष्टात आल्याचं म्हटलं जातंय. कारण या बंदीच्या काळात तो कोचिंग देखील देऊ शकणार नाहीये.

26 नोव्हेंबर रोजी NADA ने राष्ट्रीय टीमसाठी निवड चाचणी दरम्यान डोप चाचणीसाठी नमुना देण्यास नकार दिल्याने बजरंग पुनियावर चार वर्षांची बंदी घातली. यापूर्वी, NADA ने 23 एप्रिल रोजी या गुन्ह्यासाठी टोकियो ऑलिम्पिक कांस्यपदक विजेत्या कुस्तीपटूवर बंदी घातली होती. त्यानंतर जागतिक स्तरावरील कुस्ती संघटना UWW (युनायटेड वर्ल्ड रेसलिंग) कडून त्याच्यावर बंदी घालण्यात आली होती.

बजरंगने केलं होतं अपील

बजरंगने या बंदीच्या विरोधात अपील देखील केलं होतं. यावेळी NADA ने आरोपांची नोटीस जारी करेपर्यंत NADA च्या अनुशासनात्मक डोपिंग पॅनेलने (ADDP) 31 मे रोजी ते रद्द केले होते. यानंतर NADA ने 23 जून रोजी कुस्तीपटूला नोटीस पाठवली.

बजरंग पुनियाने त्याची सहकारी कुस्तीपटू विनेश फोगटसह काँग्रेसमध्ये प्रवेश केला होता. त्यांना या ठिकाणी अखिल भारतीय किसान काँग्रेसची जबाबदारी देण्यात आली होती.

त्या आंदोनलामुळे माझ्यावर बंदीची कारवाई- पुनिया

बजरंगने सुरुवातीपासूनच सांगितलेलं की, माजी WFI अध्यक्ष ब्रिजभूषण शरण सिंह यांच्या विरोधातील त्यांच्या सहभागामुळे डोपिंग नियंत्रणाच्या संदर्भात त्याला पक्षपाती वागणूक दिली जातेय.

बजरंगच्या म्हणण्यानुसार, त्याने नमुना देण्यास कधीही नकार दिला नाही. परंतु केवळ त्याच्या ईमेलवर NADA चा प्रतिसाद मागितला ज्यामध्ये त्याने डिसेंबर 2023 मध्ये त्याचे नमुने गोळा करण्यासाठी कालबाह्य किट का पाठवल्या गेल्या याची उत्तरे मागितली होती. नंतर NADA नेही यामागचं कारण स्पष्ट केलं.