वुमेन्स प्रीमियर लीग २०२५ स्पर्धेचा काऊंटडाऊन सुरु झाला आहे. काही दिवसांपूर्वी बंगळुरुत या स्पर्धेसाठीचा लिलाव पार पडला. या लिलावात युवा खेळाडूंवर कोटींची बोली लागली. या स्पर्धेच्या वेळापत्रकाची घोषणा लवकरच केली जाऊ शकते.

दरम्यान या स्पर्धेतील सामने कुठे होणार? याबाबत मोठी अपडेट समोर आली आहे. या स्पर्धेतील सामने बडोदा आणि लखनऊमध्ये खेळवले जाणार असल्याची माहिती समोर येत आहे.

वुमेन्स प्रीमियर लीग २०२५ स्पर्धेला येत्या ६ किंवा ७ फेब्रुवारीपासून सुरुवात होऊ शकते. हे सामने लखनऊ आणि बडोद्यात रंगणार आहेत. या स्पर्धेतील फायनलचा सामना देखील या दोघांपैकी एका स्टेडियमवर रंगणार आहे.

केव्हा होणार घोषणा?

या स्पर्धेत ५ संघ खेळताना दिसून येणार आहेत. मात्र पाचही संघांना सामने कुठे होणार याबाबत माहिती देण्यात आलेली नाही. माध्यमातील वृत्तानुसार हे सामने, लखनऊच्या उत्तर प्रदेश क्रिकेट असोसिएशन किंवा बडोद्यातील बडोदा क्रिकेट असोसिएशनच्या मैदानावर खेळवले जाऊ शकतात. लवकरच याबाबत अधिकृत घोषणा केली जाऊ शकते.

लखनऊच्या मैदानावर यापूर्वीही अनेक आंतरराष्ट्रीय सामने खेळले गेले आहेत. तर बडोदाचं स्टेडियम नवीनच आहे. यापूर्वी भारतीय महिला संघ आणि वेस्टइंडीज महिला संघ यांच्यात झालेला सामना याच मैदानावर खेळवला गेला होता.

फायनलचा सामना केव्हा होणार?

या स्पर्धेतील सामन्यांचे आयोजन २ टप्प्यात केले जाऊ शकते. या स्पर्धेची सुरुवात ६ किंवा ७ फेब्रुवारीला होऊन स्पर्धेतील फायनलचा सामना ८ किंवा ९ मार्चला आयोजित केला जाऊ शकतो. गेल्या हंमामात या स्पर्धेचे आयोजन बंगळुरु आणि दिल्ली या मैदानावर केले गेले होते. त्यापूर्वी संपूर्ण हंगामाचे आयोजन मुंबईत केले गेले होते.