भारतीय संघातील स्टार फलंदाज श्रेयस अय्यर सध्या तुफान चर्चेत आहे. आयपीएल २०२५ स्पर्धेसाठी झालेल्या लिलावात श्रेयसवर रेकॉर्डब्रेक बोली लागली होती. आता बिग बॉसच्या कार्यक्रमात श्रेयस अय्यर पंजाब किंग्ज संघाचं नेतृत्व करणार अशी घोषणा करण्यात आली. दरम्यान आता तो वेगळ्याच कारणामुळे चर्चेत आला आहे. सोशल मीडियावर त्याचा एक व्हिडिओ तुफान व्हायरल होतोय.

व्हायरल होत असलेल्या व्हिडिओमध्ये तुम्ही पाहू शकता की, श्रेयस अय्यर एका कॅफेमध्ये असल्याचं दिसून येत आहे. तो कॅफेमध्ये असताना, कोणाशी तरी संवाद साधत असतो. इतक्यात एक तरुणी त्याच्या जवळ येते आणि त्याच्याकडे ऑटोग्राफची मागणी करते. मोठ्या मनाचा श्रेयस ऑटोग्राफसाठी होकार देतो.

ती तरुणी ऑटोग्राफसाठी कागद देते. तो कागदावर फक्त ऑटोग्राफच देत नाही, तर एक नोट लिहतो. त्यानंतर त्या तरुणीसोबत सेल्फीही घेतो. श्रेयसच्या या मोठेपणाचा व्हिडिओ सध्या सोशल मीडियावर तुफान व्हायरल होतोय.

पंजाबचं नेतृत्व करणार

श्रेयस अय्यर गेल्यावर्षी कोलकाता नाईट रायडर्स संघाचं नेतृत्व करताना दिसून आला होता. या संघाचं नेतृत्व करताना त्याने कोलकाता नाईट रायडर्सला चॅम्पियन बनवलं होतं. त्यानंतर त्याने या संघाची साथ सोडण्याचा निर्णय घेतला.

आयपीएल २०२५ स्पर्धेपूर्वी त्याने लिलावात जाण्याचा निर्णय घेतला. दरम्यान या लिलावात सर्वच संघांनी त्याला आपल्या संघात घेण्यासाठी पूर्ण जोर लावला. अखेर पंजाब किंग्जने २६.७५ कोटी रुपये मोजत त्याला आपल्या संघात स्थान दिलं. यासह पंजाबने त्याच्याकडे कर्णधारपदाची जबाबदारीही सोपवली आहे.

श्रेयस अय्यरकडे नेतृत्वाचा चांगलाच अनुभव आहे. यापूर्वी त्याने दिल्ली कॅपिटल्स आणि कोलकाता नाईट रायडर्स संघाचं नेतृक्व केलं आहे. त्याच्या नेतृत्वाखाली खेळताना दिल्लीने फायनल गाठली होती. तर कोलकाताला त्याने चॅम्पियन बनवलं. तर दुसरीकडे रिकी पाँटिंग मुख्य प्रशिक्षकाच्या भूमिकेत असणार आहे. या जोडीने दिल्ली कॅपिटल्स संघासाठी एकत्र काम केलं आहे. आता ही जोडी पंजाबसाठी एकत्र काम करताना दिसून येणार आहे.