भारतीय क्रिकेटपटू चेतेश्वर पुजाराच्या मेहुण्याने आयुष्य संपवल्याची धक्कादायक घटना घडली आहे. मेहुण्याने आयुष्य संपवल्यानंतर त्याच्या कुटुंबामध्ये एकच खळबळ उडाली. जीत रसिखभाई पाबरी असे आत्महत्या केलेल्या मेहुण्याचे नाव आहे. त्याच्या विरोधात महिलेवर अत्याचार केल्याचा गुन्हा दाखल झाल्याने तणावात होता.

जीत रसिखभाई पाबरीच्या विरोधात एक्स-फियान्सीने अत्याचाराचा गुन्हा नोंदवला होता. तिने मालवीय नगर पोलीस ठाण्यात बलात्काराचा गुन्हा नोंदवल्यानंतर तणावात येत आयुष्य संपवल्याचे कारण समोर आलं आहे.'लग्न ठरल्यानंतर शारीरिक संबंध प्रस्थापित केले. मात्र त्यानंतर त्याने लग्न मोडले, असा एक्स-फियान्सीचा आरोप आहे.

चेतेश्वर पुजाराची सासरवाडी ही जमजोधपूर येथे आहे. मात्र, त्यांचे कुटुंब मागील २० वर्षांपासून राजकोटमध्ये राहत आहे. सासरवाडीतील कुटुंब एका कारखान्याचे मालक आहेत. चेतेश्वर पुजाराच्या पत्नीचं नाव पूजा आहे. तिला एक छोटा भाऊ आणि लहान बहीण आहे. पूजाचा जन्म हा गोंडल येथे झाला. तिने दहावीपर्यंत शिक्षण सोफिया शाळेत पूर्ण केलं. त्यानंतर ११-१२ पर्यंत शिक्षण हे अहमदाबामध्ये केलं. तर तिने मुंबईतून पदव्युत्तर शिक्षण पूर्ण केलं.

चेतेश्वर पुजारा देखील मूळचा राजकोटचा आहे. त्याने या वर्षी ऑगस्ट महिन्यात सर्व प्रकारच्या क्रिकेटमधून निवृत्ती घेतली. त्याने २०२३ मध्ये भारतीय संघासाठी शेवटचा सामना खेळला होता. मेहुण्याने आयुष्य संपवल्याने चेतेश्वर पुजारा चर्चेत आला आहे.