India vs West Indies 1st T20I:

भारत आणि वेस्टइंडीज या दोन्ही संघांमध्ये ५ टी-२० सामन्यांचा मालिका रंगणार आहे.या मालिकेतील पहिला सामना त्रिनिदादच्या मैदानावर रंगणार आहे. हा सामना भारतीय संघासाठी अतिशय खास असणार आहे.

कारण हा भारतीय संघाचा २०० वा टी-२० सामना असणार आहे.आतापर्यंत झालेल्या १९९ सामन्यांपैकी १२७ सामन्यांमध्ये भारतीय संघाने बाजी मारली आहे.यादरम्यान विराट कोहली हा भारतीय संघातील सर्वात यशस्वी फलंदाज ठरला आहे.

भारत आणि वेस्टइंडीज या दोन्ही संघांचा रेकॉर्ड पाहिला तर हे दोन्ही संघ २५ वेळेस आमने सामना आले आहेत. यादरम्यान भारतीय संघाने १७ सामन्यांमध्ये विजय मिळवला आहे. तर ७ सामन्यांमध्ये पराभवाचा सामना करावा लागला आहे.

भारतीय संघाने श्रीलंकेविरूद्ध खेळताना सर्वाधिक २९ सामने खेळले आहेत. यादरम्यान भारतीय संघाने १९ सामन्यांमध्ये विजय मिळवला आहेय तर ९ सामन्यांमध्ये भारतीय संघाला पराभवाचा सामना करावा लागला आहे.

ऑस्ट्रेलियाविरूद्धच्या २६ सामन्यांमध्ये भारतीय संघाने १५ सामन्यांमध्ये बाजी मारली आहे. तर न्यूझीलंडविरूद्धच्या २५ सामन्यांपैकी १२ सामन्यांमध्ये भारतीय संघाने विजय मिळवला आहे.

किंग कोहली ठरलाय सर्वात यशस्वी फलंदाज..

भारतीय संघासाठी टी-२० क्रिकेटमध्ये सर्वाधिक धावा करण्याचा विक्रम विराट कोहलीच्या नावे आहे. त्याने १०७ इनिंगमध्ये ४००८ धावा केल्या आहेत. यादरम्यान त्याने ३७ अर्धशतके आणि १ शतक झळकावले आहे.

इतकेच नव्हे तर तो भारतीय संघासाठी टी-२० क्रिकेटमध्ये सर्वाधिक चौकार मारणारा फलंदाज देखील आहे. आशिया चषक आणि आयसीसी टी-२० वर्ल्डकप खेळताना त्याने सर्वाधिक धावा केल्या आहेत. (Latest sports updates)

आज रंगणार सामना..

भारत आणि वेस्टइंडीज या दोन्ही संघांमध्ये पहिल्या टी-२० सामन्याचा थरार रंगणार आहे. या सामन्यात भारतीय संघाच्या कर्णधारपदाची जबाबदारी हार्दिक पंड्याकडे सोपवण्यात आली आहे.

तर रोहित शर्मा आणि विराट कोहलीसारख्या दिग्गज खेळाडूंना विश्रांती दिली गेली आहे. या सामन्यात युवा भारतीय फलंदाज यशस्वी जयस्वाल आणि तिलक वर्माला पदार्पण करण्याची संधी दिली जाऊ शकते.