भारत आणि इंग्लंड या दोन्ही संघांमध्ये ५ टी-२० सामन्यांच्या मालिकेतील चौथा सामना पुण्यातील महाराष्ट्र क्रिकेट असोसिएशनच्या मैदानावर पार पडला. या सामन्यात इंग्लंडने नाणेफेक जिंकून प्रथम गोलंदाजी करण्याचा निर्णय घेतला होता.

प्रथम फलंदाजी करण्यासाठी आलेल्या भारतीय संघाने २० षटकअखेर ९ गडी बाद १८१ धावा केल्या होत्या. या धावांचा पाठलाग करताना इंग्लंडला अवघ्या १६६ धावा करता आल्या. हा सामना भारतीय संघाने १५ धावांनी आुपल्या नावावर केला.

भारतीय संघाने केल्या १८१ धावा

या सामन्यात भारतीय संघाने प्रथम फलंदाजी करताना २० षटकअखेर १८१ धावांचा डोंगर उभारला. भारतीय संघाला सुरुवातीलाच ३ मोठे धक्के बसले. पहिल्या षटकात १२ धावा आल्यानंतर दुसऱ्या षटकात, महमूदने संजू सॅमसन, तिलक वर्मा आणि सूर्यकुमार यादवला एकाच षटकात बाद केलं आणि भारतीय संघाला बॅकफूटवर ढकललं.

इथून भारतीय संघाचं १५० धावांच्या पारही जाणं कठीण दिसून येत होतं. मात्र रिंकू सिंगने ३० धावांची खेळी करत मजबूत पाया रचला. त्यानंतर हार्दिक पंड्या आणि शिवम दुबेने धावांचा डोंगर उभा केला. हार्दिक पंड्या आणि शिवब दुबेने मिळून ८७ धावांची भागीदारी केली. यादरम्यान शिवम दुबेने ३४ चेंडूंचा सामना करत ५३ धावांची खेळी केली.

यादरम्यान त्याने ७ चौकार आणि २ षटकार खेचले. तर हार्दिक पंड्याच्या कामगिरीबद्दल बोलायचं झालं, तर त्याने ३० चेंडूंचा सामना करत ५३ धावांची खेळी केली. यादरम्यान त्याने ४ चौकार आणि ४ षटकार मारले.

इंग्लंडचा पराभव

इंग्लंडला हा सामना जिंकण्यासाठी १८२ धावा करायच्या होत्या. आव्हान मोठं होतं, या आव्हानाचा पाठलाग करताना इंग्लंडने दमदार सुरुवात केली. सलामीला फलंदाजीला आलेल्या फिल सॉल्ट आणि बेन डकेटने मिळून ६२ धावा जोडल्या. फिल सॉल्ट २३ धावा करत माघारी परतला. तर बेन डकेटने ३९ धावा केल्या.

त्यानंतर कर्णधार जोस बटलर अवघ्या २ धावा करत माघारी परतला. इथून इंग्लंडचा संघ बॅकफूटवर गेला होता. मात्र त्यानंतर हॅरी ब्रुक २६ चेंडूंचा सामना करुन ५१ धावांची खेळी करत माघारी परतला.

या खेळीदरम्यान ब्रुकने ५ चौकार आणि २ षटकार खेचले. शेवटी जेमी ओव्हरटनने पूर्ण जोर लावला. मात्र भारतीय गोलंदाजांनी इंग्लंडला लक्ष्य पूर्ण करण्यापासून रोखलं. हा भारताचा मायदेशात खेळताना सलग १७ वा मालिका विजय ठरला आहे. भारतीय संघाने २०१९ पासून सलग १७ टी-२० मालिका जिंकल्या आहेत.