चॅम्पियन्स ट्रॉफीमधला हायव्होल्टेज सामन्यामध्ये भारताचा विजय झाला. भारताच्या संघाने पाकिस्तानवर ६ गडी राखून विजय मिळवला. हा चॅम्पियन्स ट्रॉफी २०२५ मध्ये भारताचा दुसरा विजय आहे. भारताने आजचा सामना जिंकल्यानंतर पाकिस्तानचा चॅम्पियन्स ट्रॉफीमधील आव्हान संपुष्टात आल्याचे म्हटले जात आहे. दरम्यान भारताच्या विजयानंतर सोशल मीडियावर मीम्सचा महापूर आला आहे.

महाकुंभमेळ्यात प्रसिद्ध झालेल्या आयआयटी बाबाने आजच्या भारत-पाकिस्तानचा सामना भारताचा संघ हारणार अशी भविष्यवाणी केली होती. त्याची ही भविष्यवाणी खोटी ठरल्याने त्यासंबंधित मीम्स व्हायरल होत आहेत.

भारताने पहिला सामना बांगलादेश विरुद्ध खेळला. या सामन्यात बांगलादेशवर ६ गडी राखून भारताने विजय मिळवला होता. आता आजच्या भारत-पाकिस्तान सामन्यामध्येही भारताने पाकिस्तानला ६ गडी राखून धूळ चारली आहे. सलग दुसऱ्या विजयामुळे भारताने चॅम्पियन्स ट्रॉफीतल्या उपांत्य फेरीतली जागा काहीशी पक्की केली आहे.

दुसऱ्या बाजूला पाकिस्तानचा हा दुसरा पराभव आहे. पहिल्यांदाच पाकिस्तानकडे चॅम्पियन्स ट्रॉफीचे यजमानपद देण्यात आले. पण यजमानच पहिले चॅम्पियन्स ट्रॉफीतून बाहेर पडतील असे म्हटले जात आहे. यजमानपद असताना सलग दोन सामने हरण्याचा लाजिरवाणा रेकॉर्ड पाकिस्तानच्या संघाने केले आहे.

दरम्यान पाकिस्तानवर भारताने केलेल्या विजयाचा देशभरात जल्लोष होत आहे. सोशल मीडियावरही लोक आनंदाने विजय साजरा करत आहेत. या सामन्यानंतर नेटकऱ्यांनी अनेक मीम्स पोस्ट केल्याचे पाहायला मिळत आहे.