भारताचा कर्णधार रोहित शर्मा निवृत्त होणार,अशी जोरदार चर्चा सुरु आहे. पाचव्या कसोटी सामन्याआधीच रोहित शर्मा आपला शेवटचा कसोटी खेळणार असल्याची बातमी समोर आली होती. त्यानंतर रोहितला पाचव्या कसोटीतून विश्रांती देण्याचा निर्णय घेण्यात आला.

त्यानंतर रोहितने कसोटी क्रिकेटला रामराम केला असल्याची चर्चा आणखी वाढली. दरम्यान सामन्याच्या दुसऱ्या दिवशी रोहितने या चर्चांना पूर्णविराम दिला आहे. रोहितने आपल्या निवृत्तीबाबत मोठा खुलासा केला आहे.

निवृत्तीबाबत बोलताना काय म्हणाला रोहित शर्मा? Rohit sharma on Retirement

सिडनी कसोटीतील दुसऱ्या दिवशी लंचब्रेक दरम्यान रोहितने स्टार स्पोर्ट्सच्या ब्रॉडकास्टर्सला एक मुलाखत दिली. या मुलाखतीत त्याने आपल्या निवृत्तीबाबत भाष्य केलं आहे. यासह रोहितने आपल्या भविष्याचा प्लानही सांगितला आहे. रोहितने सांगितलं की, खराब फॉर्ममुळे त्याने या सामन्यातून विश्रांती घेण्याचा निर्णय घेतला आहे. त्याने क्रिकेटमधून निवृत्त होण्याचा कुठलाही निर्णय घेतलेला नाही.

रोहित शर्मा म्हणाला, ' मी निवृत्तीचा निर्णय घेतलेला नाही. मी या खेळापासून दूर जात नाहीये. मी फलंदाजीत धावा करताना संघर्ष करतोय. त्यामुळे मी या सामन्यात विश्रांती करण्याचा निर्णय घेतला आहे.'

तसेच तो पुढे म्हणाला की, 'याची कोणतीही हमी नाही की मी २ महिन्यांनी किंवा ५ महिन्यांनी धावा करू शकेन. मी खूप क्रिकेट पाहिलं आहे. प्रत्येक मिनिट, प्रत्येक सेकंद आणि प्रत्येक दिवस जीवन बदलत असतं. माझा विश्वास आहे की गोष्टी बदलतील, परंतु त्याच वेळी मला वास्तववादीही राहायला हवं. समालोचन करत बसलेले लोक किंवा हातात लॅपटॉप घेऊन लिहिणारे लोक हे ठरवणार नाहीत की माझं भविष्य कसं असेल.'