भारताचा कर्णधार रोहित शर्माचा खराब फॉर्म अजूनही सुरूच आहे. मालिकेतील पहिला सामना मुकल्यानंतर रोहितने दुसऱ्या सामन्यात कमबॅक केलं. दुसऱ्या सामन्यात तो पूर्णपणे फ्लॉप ठरला. त्यानंतर आता तिसऱ्या सामन्यातील पहिल्या डावातही तो स्वस्तात माघारी परतला.

या सामन्यातही कर्णधार विरुद्ध कर्णधार अशी लढत पाहायला मिळाली. यावेळीही ऑस्ट्रेलियाचा कर्णधार पॅट कमिन्सने बाजी मारली. २७ चेंडू खेळून १० धावांवर फलंदाजी करत असलेला रोहितच्या या फ्लॉप शो नंतर त्याच्यावर जोरदार टीका केली जात आहे.

इंग्लंडचा माजी कर्णधार मायकल वॉनने त्याला भित्रा असं म्हटलं आहे. स्टार स्पोर्ट्सवर बोलताना मायकल वॉन म्हणाला, ' पॅट कमिन्सने खरचं चांगली कामगिरी केली.

रोहित शर्माकडे त्याच्या गोलंदाजीचं उत्तरच नव्हतं. तो खूप भित्रा दिसून आला. त्याने काही वेगळाच विचार केला होता आणि कमिन्सने वेगळ्याच प्रकारचा चेंडू टाकून त्याला बाद केलं.रोहित, कमिन्सच्या गोलंदाजीवर ॲलेक्स कॅरीच्या हातून झेलबाद होऊन माघारी परतला.

रोहित पुन्हा फ्लॉप

तर झाले असे की, भारतीय संघाची फलंदाजी सुरू असताना २३ वे षटक टाकण्यासाठी पॅट कमिन्स गोलंदाजीला आला. या षटकातील तिसरा चेंडू टप्पा पडताच बाहेरच्या दिशेने निघाला आणि बॅटची कडा घेऊन यष्टिरक्षक ॲलेक्स कॅरीच्या हातात गेला. त्याने कुठलीही चूक केली नाही आणि रोहितला १० धावांवर माघारी परतावं लागलं.

ही मालिका सध्या १-१ ने बरोबरीत आहे. त्यामुळे भारतीय संघाला हा सामना कुठल्याही परिस्थितीत हा सामना जिंकायचा आहे. त्यासाठी रोहितने खेळपट्टीवर टिकून फलंदाजी करणं अतिशय महत्वाचं होतं. मात्र असं काहीच झालेलं नाही.

रोहित शर्मा वैयक्तिक कारणास्तव पहिला कसोटी सामना खेळू शकला नव्हता. त्यानंतर त्याने दुसऱ्या कसोटीत कमबॅक केलं. या सामन्यात त्याला अवघ्या ३ आणि ६ धावा करता आल्या. आता तिसऱ्या कसोटीत तो अवघ्या १० धावा करत माघारी परतला.

जर गेल्या १० डावातील रेकॉर्ड पाहिला तर त्याला, ६,५,२३,८,२,५२,०,८,१८,११,३,६ आणि १० धावा करता आल्या आहेत. या फ्लॉप शो मुळे आता त्याने कर्णधारपद सोडण्याची आणि निवृत्ती घेण्याची मागणी जोर धरू लागली आहे.