Virat Kohli News In Marathi: भारत आणि ऑस्ट्रेलिया यांच्यात सुरु असलेल्या ५ कसोटी सामन्यांच्या मालिकेतील दुसरा सामना अॅडिलेडच्या मैदानावर रंगणार आहे. हा सामना डे-नाईट कसोटी सामना असणार आहे.

भारतीय संघ या मालिकेत १-० ने आघाडीवर आहे. या सामन्यासाठी भारतीय खेळाडू कसून सराव करताना दिसून येत आहेत. दरम्यान विराट कोहलीचा एक व्हिडिओ सोशल मीडियावर तुफान व्हायरल होतोय,ज्यात फिजिओ त्याच्या पायाला पट्टी बांधताना दिसून येत आहे.

फॅन्सचं टेन्शन वाढलं..

सोशल मीडियावर एक व्हिडिओ तुफान व्हायरल होतोय, ज्यात विराट सराव करत असताना, पायाला पट्टी बांधून घेताना दिसून येत आहे. हा व्हिडिओ व्हायरल होताच, नेटकऱ्यांचं टेन्शन वाढलं आहे.

फॅन्सला असं वाटू लागलंय की, विराट खरंच दुखापतग्रस्त आहे. मात्र विराट दुखापतग्रस्त असल्याची कुठलीही बातमी समोर आलेली नाही. त्याला किरकोळ दुखापत झाली आहे. त्यामुळे तो दुसऱ्या कसोटीत खेळताना दिसून येईल. ही क्रिकेट चाहत्यांना दिलासा देणारी बाब आहे.

पर्थ कसोटीत झळकावलं शतक

या मालिकेतील पहिला कसोटी सामना पर्थच्या मैदानावर रंगला होता. या सामन्यात विराटकडून शानदार फलंदाजी पाहायला मिळाली होती. या सामन्यातील पहिल्या डावात तो फ्लॉप ठरला होता. त्यानंतर दुसऱ्या डावात त्याने दमदार कमबॅक केलं.

दुसऱ्या डावात फलंदाजी करताना त्याने १४३ चेंडूंचा सामना करत नाबाद १०० धावांची शानदार खेळी केली. या खेळीच्या बळावर भारतीय संघाने दुसऱ्या डावात मोठी धावसंख्या उभारली.

दुसरा कसोटी सामना कधी?

भारत आणि ऑस्ट्रेलिया यांच्यातील पहिल्या कसोटीत भारतीय संघाने २९५ धावांनी विजय मिळवला होता. मालिकेतील दुसऱ्या कसोटी सामन्याला येत्या ६ डिसेंबरपासून सुरुवात होणार आहे. हा डे- नाईट कसोटी सामना असणार आहे. हा सामना अॅडिलेडच्या मैदानावर रंगणार आहे.