अखेर तो क्षण आला आहे. भारतीय संघ आयसीसी वनडे वर्ल्डकप २०२३ स्पर्धेतील पराभवाचा बदला घेण्यासाठी सज्ज झाला आहे. सुपर ८ फेरीतील शेवटच्या सामन्यात भारतीय संघ ऑस्ट्रेलियाचा सामना करताना दिसून येणार आहे. सेंट लुसियातील डॅरिन सॅमी मैदानावर होणारा हा सामना सेमिफायनलच्या दृष्टीने अतिशय महत्वाचा असणार आहे. या सामन्यात जिंकून भारतीय संघाला सेमिफायनलमध्ये जाण्याची संधी असणार आहे. दरम्यान कसा राहिलाय दोन्ही संघांचा रेकॉर्ड? जाणून घ्या.

कोण कोणावर भारी?

भारत आणि ऑस्ट्रेलिया यांच्यातील टी-२० क्रिकेटमधील रेकॉर्ड पाहिला, तर भारतीय संघाचं पारडं जड राहिल्याचं दिसून आलं आहे. दोन्ही संघ २००७ पासून आमनेसामने येत आहेत. यादरम्यान दोन्ही संघांमध्ये आतापर्यंत ३१ सामने खेळले गेले आहेत. यादरम्यान भारतीय संघाने १९ सामने जिंकले आहेत. तर ऑस्ट्रेलियाला केवळ ११ सामने जिंकता आले आहेत. तर सामना हा अनिर्णीत राहिला आहे.

वर्ल्डकपमध्ये कसा राहिलाय रेकॉर्ड?

आयसीसी टी-२० वर्ल्डकप स्पर्धेतील रेकॉर्ड पाहिला, तर दोन्ही संघ ५ वेळेस आमनेसामने आले आहेत. यादरम्यान भारतीय संघाने ३ सामन्यांमध्ये विजय मिळवला आहे. तर ऑस्ट्रेलियाला केवळ २ सामने जिंकता आले आहेत. त्यामुळे भारतीय संघाचं पारडं जड आहे. यासह न्यूट्रल वेन्यूवर खेळताना दोन्ही संघांचा रेकॉर्ड पाहिला, तर दोन्ही संघांमध्ये बरोबरीची लढत पाहायला मिळाली आहे. दोन्ही संघ ४ सामन्यांमध्ये आमनेसामने आले आहेत. यादरम्यान भारतीय संघाला २ सामन्यांमध्ये विजय मिळवता आला आहे. तर ऑस्ट्रेलियाने देखील २ सामन्यांमध्ये बाजी मारली आहे.

या सामन्यासाठी अशी असू शकते भारतीय संघाची प्लेइंग ११:

रोहित शर्मा (कर्णधार), विराट कोहली, रिषभ पंत (यष्टीरक्षक), सूर्यकुमार यादव, शिवम दुबे, हार्दिक पंड्या, रविंद्र जडेजा, अक्षर पटेल, अर्शदीप सिंग, कुलदीप यादव, जसप्रीत बुमराह.