Funny Cricket Video In Abu Dhabi T10 League: अबूधाबीमध्ये अबूधाबी ट-१० लीग स्पर्धेचा थरार सुरु आहे. या स्पर्धेतील साखळी फेरीतील सामने संपायला आले असून लवकरच प्लेऑफच्या सामन्यांना सुरुवात होणार आहे. दरम्यान दक्षिण आफ्रिकेचा माजी खेळाडू फाफ डू प्लेसिसचा एक व्हिडिओ सोशल माीडियावर तुफान व्हायरल होतोय.

फाफ डू प्लेसिस या स्पर्धेत मॉरिसन सँप आर्मीकडून खेळताना दिसतोय. साखळी फेरीतील सामन्यात खेळताना, तो गंभीर दुखापतग्रस्त होण्यापासून थोडक्यात बचावला आहे. तर झाले असे की, फाफ डू प्लेसिस सीमारेषेबाहेर जात असलेला चेंडू थांबवण्याच्या प्रयत्नात होता.

त्यावेळी सीमारेषेबाहेर जाणारा चेंडू जात असताना त्याला वेगावर नियंत्रण ठेवता आलं नाही. बॉल बॉय देखील बसला होता. मात्र डू प्लेसिस येताच तो उठून उभा राहिला.

डू प्लेसिस येण्याचं आणि बॉल बॉय उठण्याचं टायमिंग इतकं परफेक्ट झालं,की डू प्लेसिसला WWE चा स्मॅक बसला ना राव. डू प्लेसिस उडून त्या बाजूला जाऊन बसला. मुख्य बाब म्हणजे डू प्लेसिसला कुठलीही दुखापत झाली नाही. मात्र हा व्हिडिओ सोशल मीडियावर तुफान व्हायरल होतोय.

आयपीएलमध्ये या संघाकडून खेळणार

फाफ डू प्लेसिस गेल्या हंगामात रॉयल चॅलेंजर्स बंगळुरु संघाकडून खेळताना दिसून आला होता. या हंगामात त्याच्याकडे कर्णधारपदाची जबाबदारी देण्यात आली होती. आता आगामी हंगामात तो दिल्ली कॅपिटल्सकडून खेळताना दिसून येणार आहे. दिल्लीने त्याला २ कोटी रुपये मोजत खरेदी केलं आहे.