आयपीएल स्पर्धा जवळ आली आहे. काही महिन्यांपूर्वी या स्पर्धेसाठीचा लिलाव सौदी अरेबियातील जेद्दाहमध्ये पार पडला. या लिलावात युवा खेळाडूंवर पैशांचा पाऊस पाडला गेला. केवळ भारतातील नव्हे, तर जगभरातील क्रिकेट फॅन्स ही स्पर्धा सुरु होण्याची आतुरतेने वाट पाहत असतात.

ही स्पर्धा २१ मार्चपासून सुरु होणार असल्याचं म्हटलं जात आहे. मात्र स्पर्धेचं वेळापत्रक अजूनही जाहीर करण्यात आलेलं नाही. दरम्यान या स्पर्धेच्या वेळापत्रकाबाबत आणि फायनलचा सामना कुठे होणार? याबाबत एक मोठी अपडेट समोर आली आहे.

स्पोर्ट्स तकने दिलेल्या वृ्त्तानुसार, आयपीएल २०२५ स्पर्धेच्या वेळापत्रकाची घोषणा येत्या एका आठवड्यात केली जाऊ शकते. मात्र याबाबत कुठलीही अधिकृत माहिती समोर आलेली नाही. आता वेळापत्रक केव्हा जाहीर होणार, हे पाहणं महत्वाचं ठरणार आहे.

कुठे होणार फायनल?

माध्यमातील वृत्तानुसार, आयपीएल २०२५ स्पर्धेतील फायनलचा सामना कोलकात्यातील ईडन गार्डन्सच्या मैदानावर खेळवला जाऊ शकतो. तर स्पर्धेतील प्लेऑफचे दोन्ही सामने हैदराबादच्या राजीव गांधी आंतरराष्ट्रीय स्टेडियमवर खेळवले जाऊ शकतात. त्यानंतर दुसऱ्या क्वालिफायरचा आणि फायनलचा सामना कोलकात्यात खेळवला जाऊ शकतो.

यासह स्पोर्ट्स तकच्या रिपोर्टमध्ये असेही म्हटले गेले आहे की, राजस्थान रॉयल्स आणि दिल्ली कॅपिटल्सचा संघ आपले २ सामने न्यूट्रल वेन्यूवर खेळणार आहेत. त्यामुळे राजस्थान रॉयल्सला ५ सामने हे जयपूरच्या सवाई मानसिंग स्टेडियमवर रंगणार आहेत. तर उर्वरीत २ सामन्यांबाबत लवकरच निर्णय घेतला जाऊ शकतो.

तर दिल्ली कॅपिटल्सचा संघ २ सामने विशाखापट्टनममध्ये खेळताना दिसून येऊ शकतो. मात्र याबाबत कुठलीही अधिकृत माहिती समोर आलेली नाही. वेळापत्रक समोर येताच सर्व चित्र स्पष्ट होणार आहे.