RCB VS LSG IPL 2023: आयपीएल २०२३ स्पर्धेतील १५ व्या सामन्यात रॉयल चॅलेंजर्स बंगळुरू आणि लखनऊ सुपर जायंट्स हे दोन्ही संघ आमने सामने आले होते. या सामन्यात रॉयल चॅलेंजर्स बंगळुरू संघाने प्रथम फलंदाजी करताना २१२ धावा केल्या होत्या.

या आव्हानाचा यशस्वीरित्या पाठलाग करत लखनऊ सुपर जायंट्स संघाने शेवटच्या चेंडूवर १ धाव पूर्ण करत १ गडी राखून विजय मिळवला. मात्र शेवटच्या चेंडूवर असं काहीतरी घडलं ज्यामुळे बीसीसीआयने आक्रमक भूमिका घेतली आहे.

या सामन्यात धावांचा पाठलाग करत असलेल्या लखनऊ सुपर जायंट्स संघाने १९.५ षटकात २१२ धावा केल्या होत्या. शेवटच्या चेंडूवर या संघाला विजय मिळवण्यासाठी केवळ १ धावेची गरज होती. त्यावेळी हर्षल पटेलने चेंडू टाकला. हा चेंडू बॅटला न लागता सरळ यष्टीरक्षक दिनेश कार्तिकच्या हातात गेला.

दिनेश कार्तिक हिट मारणार इतक्यात दोन्ही फलंदाजांनी धाव पूर्ण केली आणि लखनऊ सुपर जायंट्स संघाला सामना जिंकून दिला. धाव पूर्ण होताच आवेश खानने जोरदार सेलिब्रेशन करत हेल्मेट फेकले. या कृत्यामुळे बीसीसीआयने आक्रमक भूमिका घेत आवेश खानला चांगलेच फटकारले आहे. (Latest sports updates)

बीसीसीआयने आपल्या अधिकृत साईटवरून आवेश खानच्या या कृत्याचा विरोध केला आहे. तसेच हे कृत्य चुकीचे असल्याचे देखील म्हटले आहे. पुढे त्यांनी लिहिले की, 'आवेश खानला आयपीएल आचारसंहितेचा भंग केल्याबद्दल फटकारण्यात आले आहे.'बीसीसीआय अॅक्शन मोडमध्ये येताच आवेश खानने देखील आपली चूक मान्य करत माफी मागितली आहे.

तसेच या सामन्याबद्दल बोलायचं झालं तर, लखनऊ सुपर जायंट्स संघाने नाणेफेक जिंकून प्रथम गोलंदाजी करण्याचा निर्णय घेतला होता. प्रथम फलंदाजी करताना २० षटक अखेर २ गडी बाद २१२ धावा केल्या होत्या.

रॉयल चॅलेंजर्स बंगळुरू संघाकडून फाफ डू प्लेसिसने सर्वाधिक ७९ धावांची खेळी केली होती. तर तर विराट कोहलीने ६१ धावांचे बहुमूल्य योगदान दिले होते. या धावांचा पाठलाग करताना लखनऊ सुपर जायंट्स संघाकडून मार्कस स्टोईनिसने सर्वाधिक ६५ धावांची खेळी केली.

तर निकोलस पूरनने ६२ धावांचे योगदान दिले. हा सामना लखनऊ सुपर जायंट्स संघाने १ गडी राखून आपल्या नावावर केला.