Asian Games 2023, India vs South Korea Hockey Match:

आशियाई क्रीडा २०२३ स्पर्धेत भारतीय खेळाडूंनी हॉकीमध्ये अंतिम फेरीचं तिकीट मिळवलं आहे. या स्पर्धेतील सेमी फायनलच्या सामन्यात भारत आणि दक्षिण कोरीया हे दोन्ही संघ आमने सामने आले होते.

या सामन्यात भारतीय खेळाडूंनी दमदार खेळ करत ५-३ ने विजय मिळवलं आहे. भारतीय खेळाडूंनी सुरूवातीपासूनच या सामन्यावर पकड बनवून ठेवली होती. आता भारतीय संघांच संपूर्ण लक्ष सुवर्णपदकावर असणार आहे.

आशियाई क्रीडा स्पर्धेत हा भारतीय हॉकी संघाचा सलग ५ वा विजय आहे. दक्षिण कोरीयाविरूद्ध झालेल्या सामन्यात भारतीय संघाने सुरूवातीपासून आघाडी बनवून ठेवली होती. पहिल्या क्वार्टरमध्ये भारतीय खेळाडूंनी ३ गोल केले.

भारताकडून हार्दिक सिंगने ५ व्या मिनिटाला गोल केला. त्यानंतर ११ व्या मिनिटाला मनदिप सिंगने आणि ललित उपाध्यायने १५ व्या मिनिटाला गोल केला. यासह भारतीय संघाने ३-० ची आघाडी घेतली. (Latest sports updates)

भारतीय संघाने ३-० ची आघाडी घेतल्यानंतर दुसऱ्या क्वार्टरच्या सुरुवातीलाच दक्षिण कोरीया संघातील खेळाडू मान जो जुंगने सलग २ गोल करून संघाचा स्कोअर २-३ पर्यंत पोहचवला. त्यानंतर पेनल्टी कॉर्नरमध्ये भारताला गोल करण्याची संधी मिळाली. या संधीचा दोन्ही हातांनी स्वीकार करत भारतीय खेळाडू अमीत रोहीदासने गोल केला आणि संघाला ४-२ ने आघाडी मिळवून दिली.

हाल्फ टाईमपर्यंत भारतीय संघ ४-२ ने आघाडीवर होता. त्यानंतर जो जुंगने गोलची हॅट्रीक करत आपल्या संघासाठी तिसरा गोल केला. भारताकडून मनदीपने संघासाठी ५ वा गोल केला. यासह भारतीय संघाने या सामन्यात ५-३ ने विजय मिळवला.