Asia Cup 2022 | मुंबई: आशिया चषक स्पर्धा २०२२ महत्वाच्या टप्प्यावर असतानाच टीम इंडियाला मोठा झटका बसला आहे. भारताचा स्टार ऑलराउंडर रवींद्र जडेजा हा आशिया चषक २०२२ स्पर्धेबाहेर गेला आहे. बीसीसीआयने शुक्रवारी जडेजा दुखापतीमुळं स्पर्धेबाहेर झाल्याची माहिती दिली आहे.

भारतीय संघ आशिया चषक स्पर्धेत चमकदार कामगिरी करत आहे. पहिल्या सामन्यात पाकिस्तानला पराभूत केल्यानंतर हाँगकाँगलाही दुसऱ्या लढतीत हरवलं आहे. रोहित शर्माच्या नेतृत्वाखाली भारताची विजयी घोडदौड सुरू असताना आणि महत्वाच्या सुपर फोर फेरीत प्रवेश केलेला असतानाच, टीम इंडियाला मोठा झटका बसला आहे.

अष्टपैलू खेळाडू रवींद्र जडेजा दुखापतीमुळं स्पर्धेबाहेर गेला आहे. बीसीसीआयने ही माहिती दिली. त्याच्या जागी ऑलराउंडर अक्षर पटेल याचा संघात समावेश केला आहे.

जडेजाने पाकिस्तान आणि हाँगकाँगविरुद्धच्या लढतींमध्ये टीम इंडियाला विजय मिळवून देण्यात महत्वाची भूमिका बजावली होती. जडेजाच्या पायाला दुखापत झाली आहे. अशा वेळी रवींद्र जडेजाचा टी-२० वर्ल्डकप स्पर्धेत समावेश करण्यात अडचणी निर्माण झाल्या आहेत.