नवी दिल्ली : पोर्तुगलचा कर्णधार आणि मॅंचेस्टर युनायटेडचा प्रसिद्ध फुटबॉलपटू क्रिस्टीयानो रोनाल्डोवर (Cristiano Ronaldo) १३ वर्षांपूर्वी एका महिलेनं बलात्काराचा आरोप (Rape case) केला होता. त्यानंतर या प्रकरणी अमेरिकेच्या कोर्टात (American Court) खटलाही दाखल करण्यात आला होता. न्यायालयात या खटल्याची सुनावणी नुकतीच झाली असून रोनाल्डोची निर्दोष मुक्तता झाली आहे. खटल्याची कारवाई थांबल्याने रोनाल्डोला दिलासा मिळाला आहे.

कॅथरीन मायोग्रा नावाच्या एका मॉडेलने २००९ साली रोनाल्डोवर बलात्काराचा आरोप केला होता. लास वेगासच्या एका हॉटेलमध्ये रोनाल्डोने अतिप्रसंग करत बलात्कार केल्याचा आरोप त्या महिलेनं केला होता. बलात्काराचे गंभीर आरोप करत मायोग्राने रोनाल्डोवर खटला दाखल केला होता. त्यावेळी रोनाल्डोने मायोग्राने केलेल्या सर्व आरोपांचे खंडन केले होते. तसेच नुकसान भरपाई म्हणून कॅथरीन मायोग्राने रोनाल्डोकडे ३.७५ लाख अमेरिकन डॉलर्सची मागणीही केली होती.

मात्र, त्यानंतर हे प्रकरण अमेरिकेच्या न्यायालयात गेले. दरम्यान, शनिवारी या खटल्याची सुनावणी अमेरिकन न्यायालयात झाली. विशेष म्हणजे ४२ पानी निकालपत्रात न्यायालयाने रोनाल्डोची सर्व आरोपांमधून निर्दोष मुक्तता केली. तसेच मायोग्राच्या वकिलांनी अयोग्य पद्धतीने न्यायललीयन प्रकियेचे पालन केले, असा ठपकाही ४२ पानी निकालपत्रात ठेवण्यात आलाय.

तसेच ही प्रक्रिया पक्षकारांकडून योग्य पद्धतीने चालवली गेली नाही. त्यामुळे हा खटला सुनावणीसाठी पुढे चालवला जाणार नाही, असं महत्वाचं निरिक्षण अमेरिकन न्यायालयानं नोंदवलं आहे. पुराव्यांअभावी रोनाल्डो विरोधात तक्रार दाखल करता येणार नाही, असंही निरिक्षण २०१९ मध्ये न्यायालयाने नोंदवलं होतं.