टीम इंडियाचा माजी गोलंदाज आणि लखनऊ सुपर जाएंट्सचा कोच झहीर खानच्या घरी चिमुकल्या पाहुण्याचं आगमन झालं आहे. नुकतंच झहीर खानने सोशल मीडियावर एक पोस्ट केली आहे. यामध्ये झहीर खान आणि सागरिका घाटगे यांच्या कुशीत चिमुकलं छोटं बाळ आहे. दोघांनीही बुधवारी सोशल मीडियाच्या माध्यमातून घरी लहानग्या मुलाचं आगमन झाल्याची बातमी चाहत्यांना दिली.

काय ठेवलं बाळाचं नाव?

सागरिका आणि झहीर यांनी त्यांच्या मुलाचं नाव फतेहसिंह असं ठेवलं आहे. याची माहिती देखील त्यांनी सोशल मीडियावरून दिलीये. यावेळी सोशल मीडियावर पोस्ट केलेल्या या फोटोच्या कॅप्सनमध्ये म्हटलंय की, "प्रेम, कृतज्ञता आणि दैवाच्या आशीर्वादांसह आम्ही आमचा चिमुकला मुलगा फतेहसिंह खानचं स्वागत करतो." या लाडक्या कपलवर आता चाहत्यांकडून कौतुकाचा वर्षाव होतोय.

चाहत्यांकडून दोघांचं अभिनंदन

सागरिका आणि झहीर यांनी ही आनंदाची बातमी सोसल मीडियावर शेअर केल्यानंतर दोघांवरही कौतुकाचा वर्षाव होतोय. चाहते या फोटोंवर कमेंट करून त्याचं अभिनंदन करतायत. यामध्ये अंगद बेदी, सुरेश रैना, आरपी सिंग यांनी दोघांचं अभिनंदन केलं आहे.

झहीर खान आणि सागरिका घाटगे यांचं २०१७ मध्ये लग्न झालं होतं. २०१६ मध्ये युवराज सिंग आणि हेझल कीच यांच्या लग्नादरम्यान त्यांनी त्यांच्या नात्याबाबत खुलासा केला होता. त्यानंतर २०१७ मध्ये त्यांनी लग्न केलं होतं.