नवी दिल्ली : भारतातील दिग्गज उद्योगपती आणि टाटा संन्सचे चेअरमन रतन टाटा यांना मोठी जबाबदारी देण्यात आली आहे. रतन टाटा (Ratan Tata) यांची पीएम केअर फंडचे नवे विश्वस्त म्हणून नियुक्ती करण्यात आली आहे. टाटा यांच्यासोबत सुप्रीम कोर्टाचे माजी न्यायाधीश केटी थॉमस आणि लोकसभचे माजी डेप्युटी स्पीकर करिया मुंडा यांना पीएम केअर फंडाच्या विश्वस्तपदाची जबाबदारी देण्यात आली आहे. (Businessman ratan tata appointed as trustee of pm care fund)

सूत्रांनी दिलेल्या माहितीनुसार, देशातील काही दिग्गज व्यक्तींना सल्लागार समितीत घेण्यात आलं आहे. या सल्लागार समितीत पूर्व कॅग राजीव महर्षी, इन्फोसिस फाउंडेशनचे माजी चेअरपर्सन सुधा मूर्ती, इंडिकॉर्प्स आणि पिरामल फाउंडेशनचे माजी सीइओ आनंद शाह यांच्या नावाची घोषणा करण्यात आलीय.

पंतप्रधान नरेंद्र मोदी (Narendra Modi) यांच्या अध्यक्षतेखाली मंगळवारी बोर्ड ऑफ ट्रस्टीची बैठक पार पडली. या बैठकीला केंद्रीय गृहमंत्री अमित शहा आणि अर्थमंत्री निर्मला सीतारामण उपस्थित होत्या. तसेच नव्याने नियुक्त केलेल्या सदस्यांनीही या बैठकीत हजेरी लावली. मोदींनी यावेळी नवनिर्वाचीत विश्वस्तांचे स्वागत केले. पीएम केअर फंड २०२० ला कोरोना महामारीच्या काळात आपातकालीन परिस्थितीसाठी सुरु करण्यात आला होता.