West Bengal News : पश्चिम बंगालच्या वर्धमान जिल्ह्यातील एका खासगी वैद्यकीय महाविद्यालयातील एका विद्यार्थिनीवर सामूहिक बलात्कार झाल्याची धक्कादायक माहिती समोर आळी आहे. मूळची ओडिशाची असणारी ही विद्यार्थिनी तिच्या मैत्रिणीसह जेवायला बाहेर गेली होती. तेव्हा अचानक काही अज्ञात पुरुष कॅम्पसजवळ आले. त्यांनी तिच्यावर जबरदस्ती केली. घटनेच्या वेळी तरुणीची मैत्रीण घटनास्थळावरुन पळून गेली. या प्रकरणी पोलिसांनी तिघांना अटक केली आहे. या घटनेवर मुख्यमंत्री ममता बॅनर्जी यांनी वादग्रस्त विधान केले.

ममता बॅनर्जी म्हणाल्या, "हे एक खासगी महाविद्यालय आहे. ती मुलगी खासगी वैद्यकीय महाविद्यालयात शिकत होती. रात्री १२.३० वाजता ती बाहेर कशी आली? माझ्या माहितीनुसार, ही घटना ज्या ठिकाणी घडली, ते ठिकाण जंगल परिसरात आहे. काय घडले ते मला माहिती नाही. चौकशी सुरू आहे. या घटनेने मला धक्का बसला आहे. पण खासगी वैद्यकीय महाविद्यालयांनीही त्यांच्या विद्यार्थ्यांची, विशेषत: मुलींची काळजी घेतली पाहिजे."

"मुलींना रात्रीच्या वेळी (महाविद्यालयातून) बाहेर जाऊ नये. त्यांनी स्वतःची काळजी घ्यावी. हे ठिकाण जंगलाच्या परिसरात आहे. पोलीस या प्रकरणाचा तपास करत आहेत. दोषींना शिक्षा होईल. आतापर्यंत तिघांना अटक झाली आहे. आम्ही नक्कीच कठोर कारवाई करु. मणिपूर, उत्तर प्रदेश, बिहार, ओडिशा इतर राज्यांमध्येही अशा घटना घडल्या आहेत. तेथील प्रशासनानेही कठोर निर्णय घ्यायला हवेत. आमच्या राज्यात आम्ही १-२ महिन्यांतच आरोपपत्र दाखल केले आणि न्यायालयाने दोषींना मृत्युदंडाची शिक्षा दिली", असे वक्तव्य पश्चिम बंगालच्या मुख्यमंत्री ममता बॅनर्जी यांनी केले.

अटक केलेल्या आरोपींची ओळख पोलिसांनी उघड केलेली नाही. एका पोलीस अधिकाऱ्याने पीटीआयला सांगितले, 'आम्ही या प्रकरणात तिघांना अटक केली आहे. त्यांची चौकशी सुरु आहे. ही अतिशय संवेदनशील बाब आहे. या प्रकरणाची सविस्तर माहिती लवकरच देऊ. तिन्ही आरोपींचे मोबाईल फोन जप्त करण्यात आले आहे.'