दिल्ली - कोरोना (Corona) विषाणूच्या संसर्गाची प्रकरणे कमी होत असताना केजरीवाल सरकारने दिल्लीतील (Delhi) जनतेला मोठा दिलासा दिला आहे. दिल्लीत खासगी चारचाकी वाहनातून प्रवास करणाऱ्यांना यापुढे मास्क (Mask) लावणे बंधनकारक असणार नाही. दिल्ली सरकारने शनिवारी जारी केलेल्या आदेशात हा नवा नियम सोमवारपासून लागू होणार असल्याचे म्हटले आहे.

दिल्लीत खाजगी वाहनांमध्ये एकत्र प्रवास करणाऱ्या लोकांना दिलासा देण्यासाठी दिल्ली आपत्ती व्यवस्थापन प्राधिकरणाने (DDMA) शनिवारी एका आदेशात म्हटले आहे की मास्कशिवाय पकडलेल्यांना कोणताही दंड आकारला जाणार नाही. शुक्रवारी DDMAच्या बैठकीत सार्वजनिक ठिकाणी मास्क न लावण्याचा दंड 2,000 रुपयांवरून 500 रुपये करण्यात आला आहे.

हे देखील पहा -

DDMA बैठकीनंतर दिल्ली सरकारने शुक्रवारी सर्व कोविड निर्बंध उठवले आहेत. दिल्लीत नाईट कर्फ्यू हटवण्यात आला असून राजधानीतील सर्व शाळांना एप्रिलपासून नियमित कामकाज सुरू करण्यास सांगण्यात आले आहे. सार्वजनिक ठिकाणी मास्क न लावल्याचा दंडही 2000 रुपयांवरून 500 रुपयांवर आणण्यात आला आहे.

तथापि, महानगरपालिका क्षेत्रात एकापेक्षा जास्त आठवडी बाजाराला परवानगी देण्यासह काही निर्बंध अजूनही कायम आहेत. विवाहसोहळ्यात 200 व्यक्तींची मर्यादा आणि धार्मिक स्थळी पर्यटकांच्या प्रवेशावरील निर्बंध हटवण्यात आलेले नाहीत.