लग्नाचे वऱ्हाड घेऊन जाणाऱ्या कार झाडाला धडकल्यामुळे भीषण अपघात झाला. या अपघातामध्ये सहा जणांचा जागीच मृत्यू झाला. तर दोन जण गंभीर जखमी आहेत. जखमींवर जवळच्या रूग्णालयात उपचार सुरू आहे. कार इतक्या वेगाने झाडाला धडकली की सर्व दरवाजे लॉक झाले. त्यामुळे कारमधील मृतदेह कारच्या बाहेर काढण्यासाठी गॅस कटरचा वापर करावा लागला. उत्तर प्रदेशमधील कुशीनगर येथे रविवारी रात्री हा भीषण अपघात झाला. लग्नाला जाणाऱ्या कारचा अपघात झाल्यामुळे लग्नघरी शोककळा परसली आहे. एका क्षणात आनंदाचे वातावरण दुःखात बदलले.

कुशीनगरमधील पडरौना-पनियहवा मार्गावर भुजौली शुक्ल गावाजवळ रविवारी रात्री भीषण अपघात झाला. या भीषण अपघातात सहा जणांचा जागेवरच मृत्यू झाला, तर दोन जण गंभीर जखमी झाले. नेबुआ नौरंगिया येथील देवगांव येथे लग्न समारंभासाठी गेलेली एक भरधाव कार अनियंत्रित होऊन झाडावर आदळली. अपघात इतका भयानक होता की, मृतदेह बाहेर काढण्यासाठी गॅस कटरचा वापर करावा लागला.

नारायणपूरमधून आठ जण कारमधून लग्नासाठी निघाले होते. कार अतिशय भरधाव वेगाने सुरू होती. भुजौली शुक्ल गावाजवळ चालकाचा कारवरील ताबा सुटला आणि कार थेट झाडावर जाऊन आदळली. झाडाला इतकी जोरदार टक्कर दिली कारचा चक्काचूर झाला. अपघाताचा आवाज परिसरात गेला. अपघाताची माहिती मिळताच स्थानिकांनी घटनास्थळी धाव घेतली. पण कार चक्काचूर झाल्याने कोणालाही बाहेर काढणे शक्य झाले नाही. मृतदेह बाहेर काढण्यासाठी गॅस कटरचा वापर करावा लागला.

अपघाताची माहिती मिळताच पोलिसांनी घटनास्थळी धाव घेतली. पोलिसांनी गॅस कटरच्या मदतीने गाडीमधील जखमींना आणि मृतांना बाहेर काढले. पोलिसांनी तात्काळ जखमींना जवळच्या रूग्णालयात दाखल केले. गोरखपूर येथील रूग्णालयात त्यांच्यावर उपचार सुरू आहेत.