• वृंदावनमध्ये बांधकाम सुरू असलेल्या मॉलमध्ये शटरिंग कोसळले

• शटरिंग कोसळून तीन कामगारांचा मृत्यू

• ओमेक्स मॉलच्या बांधकामस्थळी घडली मोठी दुर्घटना

• एक कामगार गंभीर जखमी झाला असून त्यांच्यावर उपचार सुरू आहेत.

उत्तर प्रदेशच्या वृंदावनमध्ये मोठी दुर्घटना घडली. शटरिंग कोसळल्याने तीन कामागरांचा मृत्यू झाला. रुक्मिणी विहारमधील बांधकाम सुरू असलेल्या ओमेक्स मॉलमध्ये सकाळच्या सुमारास ही घटना घडली. या घटनेमध्ये एक कामगार गंभीर जखमी झाला असून त्यांच्यावर सध्या रुग्णालयात उपचार सुरू आहेत. या घटनेची माहिती मिळताच अग्निशमन दलाने घटनास्थळी धाव घेत बचावकार्य सुरु केले. पोलिसांनी देखील घटनास्थळी धाव घेत तपास सुरू केला.

ओमेक्स रुक्मणी विहार चौकाजवळ एका मॉलचे बांधकाम सुरु आहे. सकाळी ७ वाजताच्या सुमारास कामगार शटरिंग बसवण्याच्या कामात व्यस्त होते. अचानक शटरिंग तुटून खाली पडले. ते पडताच एकच गोंधळ उडाला. या शटरिंगखाली चार कामगार गाडले गेले. घटनास्थळी काम करणाऱ्या इतर कामगारांनी आणि कर्मचाऱ्यांनी बचावकार्य सुरू केले. चौघांनाही ढिगाऱ्याखालून बाहेर काढण्यात आले. तोपर्यंत एका कामगाराचा मृत्यू झाला होता.

गंभीर जखमी झालेल्या ३ कामगारांना तात्काळ रुग्णालयात नेण्यात आले. पण तोपर्यंत दोघांनी प्राण सोडले. डॉक्टरांनी त्यांची तपासणी करत मृत घोषीत केले. तर एका कामगाराच्या डोक्याला गंभीर दुखापत झाली असून त्याची प्रकृती चिंताजनक आहे. त्याच्यावर प्राथमिक उपचार करून आग्रा येथील एसएन मेडिकल कॉलेजमध्ये पाठवण्यात आले आहे. पोलिसांनी सांगितले की, फक्त चार जण ढिगाऱ्याखाली गाडले गेले होते. सर्वांना बाहेर काढण्यात आले. तिघांचा मृत्यू झाला असून एकाला आग्रा येथे पाठवण्यात आले आहे.

दरम्यान, गेल्या ३ वर्षांपासून बांधकाम सुरू आहे. तिथे दररोज सुमारे ५० मजूर काम करतात. अपघाताच्या वेळी तिथे ५ मजूर काम करत होते. त्यातील एक मजूर थोड्या वेळासाठी बाजूला गेल्यामुळे त्याचा जीव वाचला. जवळच्या रहिवाशांनी दिलेल्या माहितीवरून पोलिस घटनास्थळी पोहोचले. ही घटना नेमकी कशी घडली याचा तपास पोलिस सध्या करत आहेत.