उत्तर प्रदेशची राजधानी असलेल्या लखनौमधील अलीगंज भागात असलेल्या एका कोचिंग सेंटरला भीषण आग लागली आहे. आगीने काही वेळेत रौद्र रूप धारण केले. इमारतीमध्ये अनेकजण अडकल्याची भीती वर्तवण्यात येत आहेत. हे कोचिंग सेंटर पूर्णिया क्रॉसिंगजवळ आणि 'पब्लिक सर्व्हिस कमिशन'च्या कार्यालयामागे आहे. कोचिंग सेंटरमधील विद्यार्थ्यांनी आपला जीव वाचवण्यासाठी इमारतीच्या खिडकीतून खाली उड्या मारल्या. या घटनेचा व्हिडिओ सोशल मीडियावर व्हायरल झाला आहे.

आग लागल्याच्या घटनेची माहिती मिळताच अग्निशमन दलाच्या अनेक गाड्या घटनास्थळी दाखल झाल्या आहेत. दरम्यान आगीत काही लोक अडकल्याचे वृत्त आहे. अनेक विद्यार्थ्यांनी सुरक्षित ठिकाणी उड्या मारून स्वतःचा जीव वाचवला. मदत आणि बचावकार्य सुरू आहे. मिळालेल्या माहितीनुसार हायड्रोलिक प्लॅटफॉर्म असलेल्या एका गाडीसह अग्निशमन दलाच्या १४ गाड्या आग शमवण्याच्या कामात गुंतल्या आहेत.

एडीसीपी (उत्तर) ट्विंकल जैन आणि जिल्हाधिकारी (DM) विशाख घटनास्थळी पोहोचलेत. उपमुख्यमंत्री ब्रजेश पाठक हे देखील घटनास्थळी दाखल झाले आहेत. अग्निशमन दल आग नियंत्रणात आणण्यासाठी सतत प्रयत्न करत आहे. रविवारी अलीगंज परिसरातील एका कोचिंग सेंटरमध्ये भीषण आग लागली. आग लागताच संपूर्ण इमारतीत वेगाने धूर पसरला. हे पाहून स्थानिक नागरिकांनी त्वरित अग्निशमन दलाला याची सूचना दिली.