उत्तर प्रदेशातील कुशीनगर येथून एक धक्कादायक बातमी समोर येत आहे. एका ६० वर्षीय वृद्धाने १५ वर्षीय मुलीसोबत जबरदस्तीने लग्न केलं. नंतर जंगलात नेत तिच्यावर बलात्कार केला. तसेच घरी गेल्यानंतरही अल्पवयीन मुलीवर लैंगिक अत्याचार केला. पीडितेनं पोलिसांकडे तक्रार दाखल केली. तक्रारीनुसार, पोलिसांनी तात्काळ कारवाई करत गुन्हा दाखल केला. पोलिसांनी आरोपीला अटक करून तुरुंगात पाठवले आहे. या घटनेनंतर परिसरात खळबळ उडाली आहे.

पोलिसांनी दिलेल्या माहितीनुसार, ही धक्कादायक घटना मंगळवारी नेबुआ नौरंगिया पोलीस स्टेशन हद्दीतील गावात घडली आहे. ६० वर्षीय वृद्धाने १५ वर्षीय अल्पवयीन मुलीसोबत लग्न केले होते. मंदिरातून परतत असताना जंगलात तिच्यावर बलात्कार केला. त्यानंतर त्यानं त्याच्या घरीही अल्पवयीन मुलीवर लैंगिक अत्याचार केला.

पीडितेनं थेट पोलीस ठाणे गाठले. पीडितेच्या तक्रारीवरून पोलिसांनी तात्काळ कारवाई केली. नेबुआ नौरंगिया पोलीस स्टेशनचे प्रभारी दीपक सिंह म्हणाले की, पीडितेच्या तक्रारीच्या आधारे आरोपीविरोधात गुन्हा दाखल करण्यात आला आहे. आरोपीला अटक करून तुरूंगात पाठवण्यात आलं आहे.

पोलिसांनी सांगितले की, अल्पवयीन मुलीची वैद्यकीय तपासणी केली जात आहे. पीडितेचा जबाब नोंदवला जाईल. सध्या पोलिसांकडून अधिक तपास सुरू असून, आरोपीवर कठोर कारवाई केली जाईल, असं ते म्हणाले. दरम्यान, या घटनेनंतर परिसरात खळबळ उडाली आहे. या घटनेमुळे समाजातील अल्पवयीन मुलींच्या सुरक्षिततेबाबत गंभीर प्रश्न उपस्थित होत आहे.