युगांडा : एकीकडे भारतात दिवाळीचा (Diwali) सण उत्साहात साजरा केला जात असताना, दुसरीकडे आक्रिकेच्या युगांडा शहरात एक भयंकर घटना घडली. युगांडात अंध मुलांच्या शाळेला भीषण आग लागली. या घटनेत आतापर्यंत ११ जणांचा होरपळून मृत्यू झाला. तर ६ जण गंभीर जखमी झाले. जखमींना तातड़ीने रुग्णालयात दाखल करण्यात आले आहे. (Fire Incident Latest News)

पोलिसांनी दिलेल्या माहितीनुसार, ही दुर्देवी घटना मंगळवारी (२५ ऑक्टोबर) घडली. प्राप्त माहितीनुसार, युगांडा शहरातील मुकोनो परिसरात अंध मुलींची शाळा असून शाळेला लागूनच वसतीगृह सुद्धा आहे. मंगळवारी मध्यरात्रीच्या सुमारास शाळेला अचानक आग लागली.

बघता-बघता या आगीने रौद्ररूप धारण केलं. आगीची माहिती मिळताच, स्थानिकांनी शाळेकडे धाव घेत, विद्यार्थ्यांना सुखरूप बाहेर काढलं. मात्र, या घटनेत विद्यार्थ्यांसह तब्बल ११ जणांचा मृ्त्यू झाला. आग नेमकी कशामुळे लागली याचे कारण अद्यापही स्पष्ट झालेलं नाही.

दुर्घटनेचं हे ठिकाण कंपाला या राजधानीच्या शहरापासून पूर्वेला ३० किमी आहे. युगांडामध्ये शाळांना आगी लागणं ही आता सामान्य बाब झाली असून वसतिगृहांमध्ये बऱ्याचदा अशा आगी लागतात. बहुतेक आगी या दोषपूर्ण इलेक्ट्रिसिटी वायरिंगमुळे लागल्या असल्याचं अधिकारी सांगतात. तर काही आगा या देशात जाणूनबुजून लावल्याचंही नागरिक सांगतात.

Edited By - Satish Daud