जम्मू-काश्मीरच्या गुरेझ सेक्टरमध्ये भारतीय लष्कर आणि स्थानिक पोलिसांमध्ये दहशतवाद्यांशी चकमक झाली. या चकमकीत दोन दहशतवादी ठार झाले असून, नियंत्रण रेषेवर (एलओसी) घुसखोरीचा प्रयत्न हाणून पाडण्यात सुरक्षा दलांना यश मिळाले आहे. या कारवाईनंतर परिसरात काहीकाळ तणावाचे वातावरण निर्माण झाले होते.

श्रीनगरस्थित चिनार कॉर्प्सने सोशल सोशल मीडिया प्लॅटफॉर्म एक्सवर दिलेल्या माहितीनुसार, जम्मू काश्मीर पोलिसांना संभाव्य घुसखोरीबाबत माहिती मिळाली होती. गुप्त माहिती मिळाल्यानंतर संयुक्त कारवाई करण्यात आली. दरम्यान, सतर्क जवानांना संशयास्पद हालचाली दिसल्या. त्यांनी घुसखोरांना आव्हान दिले. मात्र, दहशतवाद्यांनी अंदाधुंद गोळीबार करण्यास सुरूवात केली.

प्रत्युत्तरादाखल लष्करांनी कारवाई करत दोन दहशतवाद्यांना ठार केले. यापूर्वीही २ ऑगस्ट रोजी कुलगाम जिल्ह्यातील अखल देवसर भागात झालेल्या चकमकीत दोन दहशतवादी ठार झाले होते. लष्करानं १ ऑगस्ट रोजी या भागांत ऑपरेशन अखल सुरू केले होते.

तब्बल १२ दिवस चाललेल्या या मोहिमेत ९ ऑगस्ट रोजी दोन जवान शहीद झाले होते.