नवी दिल्ली : पश्चिम बंगालमध्ये भाजपला मोठा झटका बसण्याची शक्यता आहे. टीएमसीचे वरिष्ठ नेते कुणाल घोष यांच्या दाव्याने बंगालमध्ये राजकीय घडामोडींना वेग आला आहे. भाजपचे दोन खासदार २१ जुलै रोजी टीएमसीमध्ये सामील होणार असल्याचा दावा कुणाल घोष यांनी केला आहे. दोन खासदारांनी टीएमसीत प्रवेश केल्यास भाजपला मोठा फटका बसण्याची शक्यता आहे.

टीएमसीचे वरिष्ठ नेते कुणाल घोष यांनी २१ जुलै रोजी भाजपच्या दोन खासदारांनी तृणमूल काँग्रेसमध्ये प्रवेश करण्याची इच्छा व्यक्त केल्याचं त्यांनी म्हटलं आहे. या दोन्ही खासदारांच्या प्रवेशाविषयी पश्चिम बंगालच्या मुख्यमंत्री ममता बॅनर्जी आणि राष्ट्रीय महासचिव अभिषेक बॅनर्जी यांच्याशी चर्चा केल्यानंतर निर्णय घेण्यात येणार असल्याचे त्यांनी सांगितले.

घोष यांनी दावा केला आहे की, 'पश्चिम बंगालमध्ये भाजपचे १२ खासदार आहेत. त्यातील दोन आमच्या संपर्कात आहेत. त्यांनी संपर्क करून तृणमूल काँग्रेसमध्ये सामील होण्याची इच्छा व्यक्त केली आहे. ते ममता बॅनर्जी यांच्या प्रमुख उपस्थितीत २१ जुलै रोजी प्रवेश करण्याची शक्यता आहे'. दरम्यान, पक्षांतर बंदीच्या कायद्यामुळे काही काळ थांबण्याचा सल्ला तृणमूल काँग्रेसने दिला आहे, असं सांगण्यात येत आहे.

'ममता बॅनर्जी आणि अभिषेक बॅनर्जी यांच्याशी चर्चा करून अंतिम निर्णय घेण्यात येणार आहे. भाजपचे पश्चिम बंगालचे अध्यक्ष आणि केंद्रीय मंत्री सुकांत मजूमदार यांनी घोष यांचा दावा फेटाळत म्हटलं की, 'कुणाल घोष नेहमीच असं विधान करत असतात. त्यांच्या दाव्याला गांभीर्याने घेण्याची गरज नाही'. आता २१ जुलैपर्यंत थांबलं पाहिजे. आम्ही याआधी देखील घोष यांच्या सारखे दावे ऐकले आहेत. ते प्रसिद्धीसाठी असे विधान करत असतात'. 'टीएमसीकडून अशा प्रकारचे दावे होत असतात. त्यामुळे त्यांच्या दाव्याला गांभीर्याने घ्यायची गरज नाही, असेही भाजपने म्हटलं आहे.