मुंबईतील जुहू परिसरात बॉलीवूड अभिनेता टायगर श्रॉफच्या कारवर गोळीबार झाल्याच्या घटणेननंतर उत्तर प्रदेश पोलिसही सतर्क झाले आहेत. अभिनेत्री दिशा पाटणीच्या बरेली येथील घराच्या सुरक्षेत वाढ करण्यात आली आहे. गेल्या वर्षी गोल्डी बरार आणि रोहित गोदारा गँगने दिशा पाटणीच्या घरावर सलग दोन दिवस गोळीबार केला होता. आता टायगर श्रॉफवरील गोळीबाराच्या घटनेनंतर दिशाच्या घरावरील हल्ल्याच्या आठवणी पुन्हा ताज्या झाल्या आहेत.

रविवारी मुंबईत टायगर श्रॉफवर गोळीबार झाल्याच्या घटनेनंतर काही तासांतच दिशा पाटणी टायगरच्या घरी पोहोचली होती. दुसरीकडे उत्तरप्रदेश पोलिसांनीही दिशाच्या घराची सुरक्षा वाढवली आहे. टायगर श्रॉफवरील गोळीबारानंतर बरेलीमध्ये दिशा पाटणीच्या घराच्या सुरक्षेचा आढावा घेण्यासाठी पोलीस उपअधीक्षक दाखल झाले. गेल्या वर्षी घरावर झालेल्या गोळीबारानंतर तेथे एक हेड कॉन्स्टेबल आणि चार पोलीस कर्मचारी तैनात करण्यात आले आहेत. तसेच पाटणी कुटुंबाला तीन सशस्त्र सुरक्षा रक्षकही देण्यात आले आहेत.

पोलिस अधिकाऱ्यांनी दिशा पाटणीचे वडिलांशी चर्चा करून सुरक्षेची माहिती घेतली. तसेच घराच्या सुरक्षेसाठी तैनात असलेल्या पोलिसांना सतर्क राहण्याच्या सूचना देण्यात आल्या आहेत. दिशा पाटणी ही उत्तर प्रदेशमधील बरेली येथे राहते. या निवासस्थानी तिचे वडील आणि बहीण खुशबू पाटणी राहतात. गेल्या वर्षी दिशा पाटणीच्या बरेली येथील घरावर झालेल्या गोळीबाराच्या प्रकरणाचा तपास करताना पोलिसांसमोर अनेक महत्त्वाचे तपशील आले होते. या प्रकरणात रविंद्र हा मुख्य शूटर असल्याचे समोर आले होते.