अयोध्येतील राम मंदिरातील दान चोरीवरुन विरोधकांच्या निशाणावर भाजप असतानाच तेलंगणाचे मुख्यमंत्री रेवंत रेड्डी यांचं वादग्रस्त विधान समोर आलंय. राम श्रीमंतांचे देव आहेत, महादेव गरिबांचा देव आहेत, म्हणून भाजप 'हर हर महादेव'चा जयघोष करत नाही, असं रेवंत रेड्डींनी एका मुलाखतीत म्हटल्याने वाद निर्माण झालाय.

मुख्य म्हणजे ही टिप्पणी करताना रेड्डी यांनी दक्षिण भारतातील लोक द्रविड आहेत आणि उत्तर भारतातील लोक आर्य आहेत, याकडे लक्ष वेधलंय. मात्र या वक्तव्यावरुन भाजपचे ज्येष्ठ नेते शहानवाझ हुसेन यांनी काँग्रेसचा समाचार घेत लोकांमध्ये संभ्रम करण्याचा प्रयत्न असल्याचं म्हटलंय.

उत्तर भारतातील भाजपच्या निवडणुकीतील यशाचा संदर्भ देत,रेवंत रेड्डी यांनी भाजपने प्रभू राम यांना चोरले आहे, असा तिखट हल्लाबोल केल्याने भाजप नेते अस्वस्थ झाले आहेत. केंद्रीय मंत्री आणि भाजप नेते संजय कुमार बांदी यांनी मुख्यमंत्री रेड्डी हे श्रीराम आणि महादेव यांच्यात राजकीय फूट पाडण्याचा प्रयत्न करत असल्याचा आरोप केलाय.

एकीकडे देशभरातील विरोधक SIR वरुन निवडणूक आयोग आणि मोदी सरकारवर तुटून पडलेले आहेत. त्यात आता रेवंत रेड्डींच्या विधानानं वाद पेटलाय. यापूर्वी थोर पुरुषांना जातीचे लेबल लाऊन राजकारण केल्याचं आपण पाहिलं आहे. आता देवांचीही गरीब-श्रीमंत अशी वाटणी केल्यानं नव्या मुद्द्यावर राजकारण पेटण्याची शक्यता आहे.