भरत मोहळकर, साम टीव्ही, प्रतिनिधी

मद्यप्रेमींसाठी आनंदाची बातमी आहे. कारण मद्यप्रेमींना आता बारवर जाण्याची गरज नाही. कारण लवकरच झोमॅटो, स्विगी आणि बिग बास्केटवरून तुम्हाला ऑनलाईन घरपोच दारु डिलिव्हरी करण्याची सोय केली जाणार आहे. यावर 6 राज्यांनी काम सुरु केलंय. त्यामुळे दारु उद्योगासाठी हा निर्णय गेमचेंजर ठरण्याची शक्यता वर्तवण्यात येतीय..

दारु उद्योगाला चालना देण्यासाठी राजधानी दिल्लीत प्रायोगिक तत्वावर दारुची होम डिलिव्हरी करण्याची तयारी सुरु करण्यात आलीय. यात फक्त दिल्लीच नाही तर देशातील सहा राज्यांमध्ये हा निर्णय प्रायोगिक तत्वावर राबवण्यात येणार आहे.

कोणत्या राज्यात मिळणार घरपोच दारू?

• तामिळनाडू

• कर्नाटक

• पंजाब

• हरियाणा

• गोवा

• केरळ

देशात प्रति व्यक्ती 5.61 लीटर दारुची विक्री होते. त्यामुळे पेट्रोल, डिझेलसह अन्न, रेशन, औषधं, कपडे घरपोच मिळत असल्याने आता दारुचीही होम डिलिव्हरी करण्याचा विचार सुरु आहे. त्याची सुरुवात लवकरच राजधानी दिल्लीतून होणार आहे. कारण मद्यविक्रीतून मिळणारा महसूल राज्य सरकारांच्या उत्पन्नाचा महत्वाचा मार्ग आहे.

कोरोनात मद्यप्रेमींकडून घरपोच दारुची मागणी करण्यात आली होती. तर कर्नाटक आणि केरळने घरपोच दारुची संकल्पना मांडली होती. मात्र ती अंमलात आली नाही. महाराष्ट्राला 2023-24 या आर्थिक वर्षात मद्यविक्रीतून तब्बल 23 हजार 250 कोटी रुपयांचा महसूल मिळालाय.त्यामुळे 6 राज्यांमध्ये घरपोच दारुचं धोरण यशस्वी ठरलं तर महाराष्ट्रातही याचा विचार होण्याची शक्यता नाकारता येत नाही.