Summary -

• जोहान्सबर्गजवळील बेकरसडल भागात पबबाहेर अंदाधुंद गोळीबार

• ३ मुलांसह ११ जणांचा मृत्यू तर अनेक जण गंभीर जखमी

• बेकायदेशीर दारू विक्री सुरू असलेल्या पबजवळ ही घटना घडली

• दोन वाहनांतून आलेल्या हल्लेखोरांकडून गोळीबार करण्यात आला

सिडनीमधील बॉन्डी बीचवर जमावावर केलेल्या अंदाधुंद गोळीबारामध्ये १५ जणांचा मृत्यू झाला होता. या गोळीबाराच्या घटनेनंतर संपूर्ण जगाला हळहळ व्यक्त केली जात आहे. ही घटना ताजी असतानाच दक्षिण अफ्रिकेमध्ये देखील अशीच घटना घडली. जोहान्सबर्गमधील एका टाऊनशिपमध्ये पबच्या बाहेर अंदाधुंद गोळीबार करण्यात आला. या गोळीबारामध्ये ११ जणांचा मृत्यू झाला तर अनेक जण गंभीर जखमी झालेत.

मिळालेल्या माहितीनुसार, रविवारी जोहान्सबर्गमधील बेकरसडल भागामध्ये हल्लेखोरांनी एका पबच्या बाहेर अंदाधुंद गोळीबार केला. पबच्या बाहेर उभ्या असलेल्या आणि येणाऱ्या-जाणाऱ्या एकाही व्यक्तीला हल्लेखोरांनी सोडले नाही. या हल्ल्यामागचा हेतू अद्याप स्पष्ट झाला नाही त्याचसोबत या हल्ल्याची जबाबदारी कुणीही स्वीकारलेली नाही. पोलिस सध्या या प्रकरणाचा तपास करत आहेत. गोळीबारामध्ये जखमी झालेल्यांना उपचारासाठी रुग्णालयात दाखल करण्यात आले.

दक्षिण अफ्रिकेतील प्रमुख सोन्याच्या खाणींपैकी एक असलेल्या बेकरसडल परिसरातील एका पबबाहेर ही गोळीबाराची घटना घडली. गोळीबार झालेल्या ठिकाणी बेकायदेशीररित्या दारू विकली जात होती. या घटनेनंतर जखमींना ताबडतोब रुग्णालयात दाखल करण्यात आले. जखमींमधील अनेकांची प्रकृती गंभीर आहे. गोळीबारानंतर हल्लेखोर फरार झाले. पोलिसांनी संपूर्ण परिसराला वेढा घातला असून हल्लेखोरांचा शोध घेतला जात आहे.

पोलिसांनी सांगितले की, जोहान्सबर्गपासून सुमारे ४० किलोमीटर अंतरावर असलेल्या सोन्याच्या खाणी असलेल्या बेकरसडल येथील एका पबबाहेर ही घटना घडली. जवळपास एक डझन संशयित हल्लेखोर दोन वाहनांमधून आले होते. त्यांनी पबच्या आत आणि बाहेर असलेल्या ग्राहकांवर अंदाधुंद गोळीबार केला. त्यामुळे सर्वजण घाबरले आणि आपला जीव वाचवण्यासाठी सैरावैरा पळू लागले. परिसरात सध्या भीतीचे वातावरण आहे.

दरम्यान, ६ डिसेंबर रोजी दक्षिण आफ्रिकेमध्ये अशाच प्रकारची गोळीबाराची घटना घडली होती. दक्षिण अफ्रिकेची राजधानी प्रिटोरियाजवळील एका वसतिगृहावर बंदूकधाऱ्यांनी हल्ला केला होता. या घटनेत तीन वर्षांच्या मुलासह १२ जणांचा मृत्यू झाला होता. पोलिसांनी या वर्षी एप्रिल ते सप्टेंबर दरम्यान बेकायदेशीर दारू दुकानांवर मोठी कारवाई केली. पोलिसांनी देशभरात अशी १२,००० ठिकाणे बंद केली आणि १८,००० हून अधिक लोकांना अटक केली आहे.