लोकसभा निवडणुकीच्या सातव्या आणि अखेरच्या टप्प्यासाठी आज शनिवारी मतदानाला सुरूवात झाली आहे. एकूण ७ राज्ये आणि एका केंद्रशासित प्रदेशातील ५७ जागांसाठी हे मतदान पार पडत आहे. सकाळी ७ वाजेपासून मतदानाला सुरुवात झालेली आहे. यामध्ये बॉलिवूड अभिनेत्री कंगना रणौत हिच्यासह अनेक दिग्गजांची प्रतिष्ठा पणाला लागली आहे. अभिनेत्री कंगना रणौत हिमाचल प्रदेशच्या मंडी लोकसभेतून निवडणूकीच्या रिंगणात उतरली आहे. अभिनेत्रीने हिमाचल प्रदेशातच आपला मतदानाचा हक्क बजावला असून तिने मतदानानंतर आपली प्रतिक्रिया दिलेली आहे.

माध्यमांसोबत संवाद साधताना कंगना रणौत म्हणाली, " मी नुकताच माझा मतदानाचा हक्क बजावला आहे. मी सर्व हिमाचल प्रदेशवासियांना सांगते की, सर्वांनीच आपला मतदानाचा हक्क बजवावा. माझ्याप्रमाणेच तुम्हीही लोकशाहीच्या उत्सवामध्ये सहभाग नोंदवला पाहिजे. आज मला आमच्या मतदारसंघात एका सणाप्रमाणेच लोकांमध्ये उत्साह पाहायला मिळत आहे. आपल्या अधिकारांसाठी अनेकांनी प्राणाची आहुती दिलेली आहे. त्यामुळे आपण सर्वांनी नक्कीच मतदानाचा हक्क बजवायला हवा. "

यावेळी अभिनेत्रीने पुन्हा एकदा पंतप्रधान म्हणून नरेंद्र मोदीच निवडून येतील, असा विश्वास व्यक्त केला आहे. अब की बार ४०० पार म्हणत तिने विरोधकांवरही टीका केली आहे. मला लोक मंडी लोकसभेतून नागरिकांची सेवा करण्याची संधी देतील, असाही विश्वास तिने माध्यमांसोबत बोलताना व्यक्त केला आहे. कंगना एक सुप्रसिद्ध अभिनेत्री असून लवकरच तिचा 'इमरजन्सी' नावाचा चित्रपट रिलीज होणार आहे. पण अद्याप तिने चित्रपटाच्या प्रदर्शनाची तारीख जाहीर केलेली नाही.