नवी दिल्ली: महागाईमुळे होरपळ झालेल्या सर्वसामान्यांना काहीसा दिलासा देणारे वृत्त आहे. मे २०२२ मध्ये किरकोळ महागाई (Retail Inflation) दरात घट नोंदवलेली आहे. मे २०२२ मध्ये किरकोळ महागाई दर ७.०४ टक्के इतका आहे. एप्रिलमध्ये हा दर ७.७९ टक्के इतका होता.

किरकोळ महागाई दरात घट होण्यामागे तेलावरील एक्साइज ड्युटीत कपात हे प्रमुख कारण असल्याचे बोलले जाते. मात्र, तेलाच्या वाढत्या किंमती आणि रशिया-युक्रेन युद्धाच्या पार्श्वभूमीवर पुरवठा साखळीत आलेल्या अडथळ्यांमुळे आगामी काही दिवसांत महागाई वाढण्याची शक्यता व्यक्त केली जात आहे.

नॅशनल स्टॅटिकल ऑफिस अर्थात एनएसओने सोमवारी प्रसिद्ध केलेल्या आकडेवारीनुसार, एप्रिलमध्ये ग्राहक किंमत निर्देशांक आधारित (CPI) महागाई दर ७.७९ टक्के इतका होता. गेल्या वर्षी मे मध्ये किरकोळ महागाई दर ६.३ टक्के होता.

रिझर्व्ह बँकेने (RBI) या महिन्यात पतधोरण जाहीर करताना चालू आर्थिक वर्षासाठी महागाईचा अंदाज ५.७ टक्क्यांवरून वाढवत ६.७ टक्के केला आहे. रिझर्व्ह बँकेकडून पतधोरणावर विचार करताना प्रामुख्याने किरकोळ महागाईवर लक्ष दिले जाते. मे महिन्यात खाण्यापिण्याच्या वस्तूंच्या महागाईचा दर हा ७.९७ टक्के होता. तर एप्रिलमध्ये हाच दर ८.३१ इतका होता. दुसरीकडे, शहरी भागात हाच दर मे महिन्यात वाढलेला दिसून आला. तर एप्रिलमध्ये शहरी भागात हाच दर ८.०९ टक्के होता. तो मे महिन्यात वाढून ८.२० टक्के झाला.

३६ दिवसांच्या आत दुसऱ्यांदा रेपो रेटमध्ये वाढ

रिझर्व्ह बँकेने महागाई नियंत्रणात आणण्यासाठी व्याजदारांमध्ये जवळपास १ टक्का वाढ केली. अवघ्या ३६ दिवसांच्या आत आरबीआयने दुसऱ्यांदा रेपो रेटमध्ये वाढ केली. आरबीआयचे गव्हर्नर शक्तिकांत दास यांनी ८ जून रोचजी रेपो रेटमध्ये ५० बेसिस पॉइंट्सने वाढ करताना ४.४० टक्क्यांवरून वाढवून ४.९० टक्के इतका केला होता. यापूर्वी ४ मे रोजी रेपो रेटमध्ये ४० बेसिस पॉइंटची वाढ केली होती.