Rahul Gandhi Protest : मतदार यादीत करण्यात आलेल्या फेरफाराचा आरोप करत 'इंडिया' (INDIA) आघाडीने आज मुख्य निवडणूक आयुक्त ज्ञानेश कुमार यांच्याविरोधात जोरदार मोर्चा उघडला. निवडणूक आयुक्तांच्या राजीनाम्याची मागणी करत विरोधकांनी संसदेपासून निवडणूक आयोगाच्या कार्यालयाकडे कूच केली. या आंदोलनामुळे मध्य दिल्लीतील सुरक्षेत मोठी वाढ करण्यात आली होती. आंदोलनादरम्यान राहुल गांधी आणि प्रियंका गांधी यांच्यासह अनेक खासदारांना पोलिसांनी ताब्यात घेतल्याची माहिती समोर आली आहे.

राहुल गांधी बॅरिकेड्सवर चढले, प्रियंका गांधी रस्त्यावर ठाण मांडून

आंदोलनादरम्यान एक थरारक दृश्य पाहायला मिळाले. लोकसभेतील विरोधी पक्षनेते राहुल गांधी हातात तिरंगा घेऊन थेट पोलिसांच्या बॅरिकेड्सवर चढले. पोलिसांनी रस्ता अडवल्यानंतर राहुल गांधी आणि प्रियंका गांधी यांनी रस्त्यावरच धरणे आंदोलन सुरू केले.

काही वेळातच पोलिसांनी राहुल गांधी आणि प्रियंका गांधी यांच्यासह 'इंडिया' आघाडीच्या अनेक खासदारांना ताब्यात घेतले. राहुल गांधींना घेऊन जाणारी पोलिसांची बस कार्यकर्त्यांच्या प्रचंड गर्दीमुळे काही काळ रस्त्यातच अडकून पडली होती.

राहुल गांधी यांनी निवडणूक आयोगाच्या कार्यालयात जाण्यासाठी गनिमी कावा केला. राहुल गांधी आणि काही खासदार जवळच असलेल्या आकाशवानी भवनात अचानक गेले. त्या ठिकाणाहून राहुल गांधी यांनी आयोगाच्या कार्यलयात शिरण्याचा प्रयत्न केला. या ठिकाणी हायव्होल्टेज ड्रामा पाहायला मिळाला आहे. दिल्लीतील राजकाऱण तापले आहे. राहुल गांधींसह विरोधीपक्षातील अनेक खासदारांनी आज मोर्चा काढलाय.

बीजू जनता दल (BJD) ची अनपेक्षित साथ

या आंदोलनाचे विशेष वैशिष्ट्य म्हणजे आतापर्यंत तटस्थ भूमिका घेणारा नवीन पटनायक यांचा 'बीजू जनता दल' (BJD) पक्षही या विरोधात सामील झाला. बीजेडी प्रमुख नवीन पटनायक यांनी आधीच 'एसआयआर' (SIR) प्रकरणाला कडाडून विरोध केला होता. आज त्यांच्या पक्षाच्या खासदारांनीही या मोर्चात सहभाग घेतला.

नीती आयोगाच्या दफ्तरासमोर पोलिसांची नाकेबंदी

विरोधी पक्षाचे खासदार निवडणूक आयोगाच्या कार्यालयाकडे जात असताना, नीती आयोगाच्या इमारतीसमोर सुरक्षा दलांनी त्यांना रोखले. यावेळी खासदारांनी मुख्य निवडणूक आयुक्त ज्ञानेश कुमार यांच्याविरोधात जोरदार घोषणाबाजी केली. जोपर्यंत ज्ञानेश कुमार आपल्या पदाचा राजीनामा देत नाहीत, तोपर्यंत हा लढा चालूच राहील, असा इशारा विरोधकांनी दिला आहे.