Rahul Gandhi On New Parliament Inauguration Row : नवीन संसद भवनाच्या उद्घाटनावरून सत्ताधारी भाजप आणि विरोधी पक्षांमध्ये सुरू झालेल्या वादानं आता टोक गाठलं आहे. त्यात आता काँग्रेसचे नेते राहुल गांधी यांनी ट्विट करून सत्ताधारी भाजप आणि केंद्र सरकारवर हल्लाबोल केला आहे. (Latest Marathi News)

नवीन संसद भवनाच्या (Parliament) उद्घाटनाचा वाद टोकाला गेला आहे. या वास्तूचे उद्धाटन पंतप्रधान नरेंद्र मोदी (Narendra Modi) यांच्या हस्ते २८ मे रोजी होणार आहे.

काँग्रेससह १९ विरोधी राजकीय पक्षांनी (Political Parties) या उद्घाटन सोहळ्यावर बहिष्कार टाकण्याची घोषणा केली आहे. या घडामोडी सुरू असतानाच राहुल गांधी यांनी एक ट्विट केले आहे. राष्ट्रपतींच्या हस्ते संसद भवनाचे उद्घाटन न करणे हा देशाचा अवमान आहे, असे ते म्हणाले.

'राष्ट्रपतींच्या हस्ते संसद भवनाचे उद्घाटन न करणे आणि त्यांना सोहळ्याला निमंत्रित न करणे हा देशाच्या सर्वोच्च संवैधानिक पदाचा अवमान आहे. संसद अहंकाराच्या विटांनी नाही, तर संवैधानिक मूल्यांनी उभारली जाते,' असे राहुल गांधी (Rahul Gandhi) यांनी ट्विटमध्ये म्हटले आहे.

नव्या संसद भवनात 'सेंगोल'

नव्या संसद भवन उद्घाटनाचा वाद सुरू असतानाच, केंद्रीय गृहमंत्री अमित शहा यांनी बुधवारी पत्रकार परिषद घेतली. आम्ही उद्घाटन सोहळ्याला सर्वांना निमंत्रित केले आहे. तुम्ही याचा संबंध राजकारणाशी जोडू नका. जुन्या परंपरांशी नव्या भारताला जोडण्याची भावनात्मक प्रक्रिया आहे. तसेच ऐतिहासिक सेंगोल नव्या संसद भवनात ठेवण्यात येणार आहे, अशीही माहिती अमित शहा यांनी दिली.